Un giorno, come che San Piero el zera belche sgionfo de ricever la gente in paradiso sempre dela medèsima maniera, el ze ndà parlar col Signor e el ghe ga domandà se el podea far diverse repartission ntel paradiso: par esser depì pràtico, el volea la sala de quili che qua ntea tera i giughea le carte; la sala dei motoristi; la sala dei dotori; la sala dei avocati; la sala dei professuri; la sala dei preti e così avanti.
Alora, quando che rivea qualche dum, saria sol dimandarghe cossa che el fea so l’era vivo, che San Piero lo menaria ntel so posto giusto. Parché, là in paradiso, no i ze mia tuti misturai come qua, cada un ghe toca ndar insieme cola so turma.
El Signor el ga catà che San Piero el ga bio na bona idea e el ghe ga dito che el podea scominsiar.
Alora, San Piero el ga ciapà na mùcia de àngeli e, in quìndese giorni i ga fato tute le repartission de acordo.
Cossita, quando che rivea qualche dum, de acordo cola ocupassion che el gavea qua ntela tera, lo inviea ntela sala correspondente.
Ma ga sucedesto che un bel giorno ghe ze morto tre fémene ntela medèsima ora e le ze rivade tute tre insieme.
San Piero le ga ciamade tute tre e el ghe ga domandà ala primi:
– Ti, cossa ze che te fei ntela tera?
– Ah, mi zera professora – la ghe ga dito.
Alora, San Piero el ga ciamà l’angeleto secretário e el ghe ga comandà:
– A questa qua, daghe la ciave dele professore e dighe a quelaltre che le pol finir la greve e che le se contente cola television che le ga.
E ti, el ghe ga domandà ala seconda: che ocupassion gaveito là ntea tera?
– Mi zera avocata.
Alora, San Piero el ghe ga dito a l’àngelo secretário:
– A questa qua, daghe la ciave dea sala dei avocati e dighe a queialtri che ze ora de finirla cole discutission che deromai son stufo.
E ti, – el ghe ga domandà ala tersa, – cosa ze che te fei co te zeri viva?
– Ah, de note mio laorea ntela Boate Flowers Nigh a far stripitisi e, durante el giorno, laorea ntei motei .
– A questa qua – ghe ga dito San Poero a l’angeleto, – a questa qua daghe la ciave del me quarto.
