Nel mese dele done , parlemo na s-cianta, de na Revolussion che ga sucedesto el di 01 de febraro de 1904, qua in Nova Trento.
Zera na matina insolarada e calda. 127 done le pareciar bastoni, pironi e enca le onge, par ndar ciapar el dotor Carmine Santorro. Le volea dargue na lission parche el zera um caluniador.
Col arsenal de guera pronto, le se ga messo par strada come um esèrcito in diression la casa de sto dotor, che el zera pena rivà dela lua de miel. Quando el ga visto quel mucio de done armade, ozando par giustìssia, el ga squase dato un ataque del corassion.
Ma parche ste done volea dargue sta lission? La stòria zera (secondo la pesquisa dela scritora Danubia Otobelli) che lu el zera dotor ma anca scritor. El ga publicà um artico ntel gornal” O Independente“ che le vècie, le done madure e anca le fiole, ndesse manco a messa parche le ndea mia par pregar e si par fal altre cose pi pecaminose. Sol che el dotor el ga generalisà, parche no le zera mia tute che ndea far pecati. Zera una dona in spessial. E anca conta mia che pecato, ma se pol far idèa.
Le done le ga planejà com rigor el castigo. Prima, le gue disea sù com parole brute. Dopo, lo mandaria magnar el jornal inteiro e se no lo magnesse mia, lo mandaria via del paese a bastonade , sgratoni, spudade, e alca col sicotade.
Ma lu el ga fato meio. El ga ciapa el gornal e un tochetin la volta el ga messo in boca e scunsià magnarlo come se fusse um piato de macaroni. Quando so sposa ze rivada ntela porta e ga visto el omo magnando sto gornal,in meso del bacan dele done, no la ga mia soportà e cascada in tera tremolando, bianca come na carta.
In meso de tuta quela barufa, riva el supraintendente che ga calmà tuti e mandai cada uma casa sua.
I jornai dela época ga noticià el sucedesto e i gue ga dato rason a le done. El dotor ga imparà no metersse pi ntela vita de nissuni.
Questa, go idèa che ze stata la prima manifestassion dele fémene dela stòria de Nova Trento. Mia come adesso, che esser feminista le assar i pei ntel sovaco, pintar i cavei de azul e odiar e parlar mal dei omi e tuto ze colpa dela ditadura del patriarcado e altre robe che gnanca no mensono parche la ndaria massa longa.
Lora, mi gue go contà questa stòria, par far veder che le done taliane del scomìsio dela colonizassion, le gavea la forsa, polea esser bruta, ma le volea gustìssia e le zera piene de la ternura quando ocorea. le ze state el alisserse invisìbile dele case fate de sassi e de sogni. Intanto que le done oncoi le parla de conquiste,´de igualità, la so vita parlava de resisténsa.
La stòria pol ver messo via el nome de tanti omi, ma la tera- questa che fiorisse, ga messo via l’ ànima dele done che ga batezà col sudor, làcrime e na speransa che gnanca el tempo sta bon de smorsar de questa tera. Lore no le ga pianta solche somense: le ga piantà destini.
Un omenàgio a le nostre brave pionere taliane che ga trasformà i mati , monti e busi in questa pátria amada.
