Dopo de vinti tre ani che Zenèsio el laorea ntela fàbrica de mòbili, i ghe ga dato na promossion: l’è deventà “chefe de sesson”. El ze restà tuto sprosion. No’l saludea gnanca pi i so amighi. E la so fémena casa, pora can, no la ghin podea pi.
Vanti de esser “chefe de sesson”, so omo el fea de tuto: el sapea ntel orto; el pintea la casa; el rangiea le finestre quando le zera a sbrindolon; el truchea le làmpade; el metea su i vieri spacai; el rangiea le fessadure e, al sabo, se el tempo el fusse de acordo, el taiea anca la grama. Se ghe fusse anca qualche vasamento, el fea l’incanador, letressista, marangon, pedrero. Ma dopo che el ga ciapà el posto de “chefe de sesson”, no ghen’era cristi che el fesse un laoro.
Un sabo dopo mesodì, la fémena la ghe ga dito:
– Zenèsio, gheto mia visto che là ntela sala ghe ze na làmpeda brusada? Sito mia bon de trucarla:
– Se toca, amor, – el ghe ga dito – eo non so eletressista. Agora eu so “chefe de sesson”
Ciò, la fémena la ga visto che el so omo, dopo che el zera deventà “chefe de sesson”, no l‘era mia pi quel.
Riva nantro sabo, e la fémena cola speransa che el se gavesse scambià, la ghe dize:
– Zenèsio, vai là ntel bagnero par veder che ghe ze un cano che spande. Ciapa le feramente e proa rangiarlo vanti che vai fora na mùcia de àqua. E Zenèsio sempre cola medèsiam litània:
– Se toca, amor. Fique sabendo che non so mais incanador. Eo agora so “chefe de sesson”.
Qua semo ben ciapai, ga pensà la dona. Ma la gavea ancora na pìcola speransa. Ma, par na desgràssia, via par la stimana, ze cascà zo un bruto temporal e el vento el ga portà via araquante télie e ga tacà piover rento de casa. Alora, la fémena, che deromai la gavea perso la passiensa, la ghe ga fin bravà:
– Zenèsio, porco fumo, gheto mia visto che ze drio piover rento de casa? Sito mia bon de rangiar el querto, o vuto dassar che la casa la se impienisse de àqua?
E Zenèsio, con tuta la so calma:
– Se toca, amor! Grassa a Deus non so marangon par rampegar su par le casa e cascar zo. Se squeceu che so “chefe de sesson”?
Alora, la fémena, belche stufa e agra, la ga pensà che ghe volea scambiar de maniera.
Ala stimana drio, ciò, Zenèsio el ze rivà casa e el ga visto tuto rangià: el cano del bagnero, la làmpeda nela sala, le télie ntel querto. Tuto a posto. Alora el ghe ga dimandà ala dona:
– Come cossita? Chi ze che ga rangià tuto qua casa?
– El to compare Artémio, pò. Te sè che lu el ze brao a far lauri de casa.
– Si, ma te galo cobrà quanto, mò?
– Gnente, no’l me ga cobrà.
– Come, gnente?
– Lu sol el me ga dito cossita: no te cobro gnente, Zenaide. Ma se te vol pròpio pagarme, mi te fao na proposta: o te me fè na torta de fràgole come quela che ghe fato doménega passada ntel aniversàrio dela me dona, o sinò, femo na scampadina ntel motel, intanto che Zenèsio el ze là ntela fábrica.
– E ti, ghe gheto fato la torta de fràgole?
Alora, la Zenaide la ghe ga respondesto:
– Se toca, amor! Te sè che dopo che te sì deventà “chefe de sesson”, eo também non so mais dossera.
Induvinela dela stimana
Cossa zela na roba che la ze là in paradiso e i ze stati i òmeni farla?
