Nostro interior le pien de belesse e de stòrie che se mescola con la fede, con el imaginàrio e stravessa generassion, mescolando memòrie, misteri, e criatività popolar. Le ze narative che no le ze scrite ntei documenti ofissiai, ma se mantegneste vive e passade de generassion par generassion. Se pol meterle fra el real e el fantástico. Le ze stòrie che sfida sentimenti de paùra, desidèri de rispeto al sopranatural e anca tante che fa de rider, che mescolade forma la nostra coltura e cosi cada comunità ga le so stòrie e noantri le contemo.
Parlemo oncoi de un bel capitel dedicà a la Nostra Segnora de Pedancino, nel Travesson Gavioli. Qui che me la ga contada ze stà Expedito Rech (che ge domando permission par scrìverla). Mi era là in meso de sto potrero drio amirar la bela cieseta e lu ne ga conta la so stòria. El capitel ze fato de sassi, ze un marco de fede, ma gnhanca tanto: Ghe ze stà tante brigue e formighe. Si! Go scrito Formighe, de quele che magna na piantela intiera nte na note.
Stá cieseta stata fata in 1909, par pagar na promessa fata par Giovanni Lotti Rech. Lu, come tuti piantea formento, dopo lo insachea e lo metea via ntela cantina fin la ora de menarlo al molin par far farina, quando el se ga inicorto i sachi de formento ga spario. Imagineve che cativo che el ze restà! El ga maladio tuti e el ga messo la colpa ai vissin. El osava “Ladroni”si tuti ladroni”. I vissin cativi con la acusassion falsa, e volea meterlo ntela gustisia. In final no i gavea fato gnente e i zera acusai de quela maneira li. Ga scuminsià na grande barufa fra de lori. Un contra laltro.
Quando sto Giovani el se ga acalmà, se ga dato conta che el ga esagerà un pochetin massa. E par fenir le brighe el ga fato na promessa de far um capitel come ringrassiamento. Passà un per de giorni e ancora cativo coi vissin, Giovani el ga inicorto che noi zera mia lori che robea el formento, e si, state le formighe.
Le formighe le è un inseto gran inteligente e c’na organisassion de far invìdia a tanti e le laora tanto. E un per de note le ga portà via el formento de Giovanni. Ma penseghe che vergogna che el ga bio. Con la coa in meso le gambe, Giovani ghe ga tocà ndar casa par casa domandar scusa ai vissin .Che vergogna!
Tuto in pace, adesso Giovani ghe ga toca comprir la promessa. El ga fato un bel Capitel a la Madona de Pedancino, che el ze in meso de un potrero e tute le ùltime domeneghe del mese, un frate el va dir la messa. Le un bel posto e cada un porta so carega e stà la scoltar la messa e apresiar la naturesa.
