– Ma Dio, Angelina! Se mi savea che te vegneu su, te gavaria portà le semense de pomidori…
– Sucece che el me omo el ghe tochea de ndar ntel Banco pagar la UDIMED(unimed) e alora son vegnesta insieme parché go de bisogno anca mi de comprarme due, trè robete. Ma come steto, comare?
– Ah, go i denòci che no i me iuta mia tanto nò. Son ancora soto i dotori, pò. E ti, comare?
– Gràssie a Dio, dopo che i me ga fato la topografia ntea gamba, me par de esser nantra. Ancora ben che i ga finio fora co sto futibol, parché ze squasi un mese che non son bona de acompagnar el rosário ale sete de note ntea Televison Aparecida.
– E là casa, pénsito che la zera come? El me omo el rivea casa el se trea là ntel sofá par veder el giugo. No’l ndea gnanca tomar bagno.
– Mi no sò che gusto che i cata de veder na trupa de òmini là a córergher drio a una bola fin che i la impianta rento ntela rede. El me omo el ga proà spiegarme un poco, ma mi no go capio gnente.
– Gnanca mi, comare, non son stata bona de capir. Go sol vardà un pochetin el giugo del Brasil parché el me omo el zera là che el bestemea e el ghe disea su a tuti i nostri giugaduri parché el Brasil el zera drio perder.
– Anca mi go visto el giugo del Brasil. Maria Santìssima! Ghen’era un grandon, bianco. Mi cato che el zera un aleman.
– Èh, pròpio! El ze stato quel che el ga fato i due guli. E me omo el ga dito che el ga squasi due metri de altessa.
– I nostri, poareti, i parea fin che i gavea poca voia de corer.
– Ah che, comare, el me omo el ga dito che dopo che i ga scominsià pintarse i brassi e le gambe, i giuga pi gnente.
– Benedeto Santo! Nantra roba che non son bona de capir. L’altro di son ndata al dotor e là ntel consultòrio ghen’era un tosato che el se gavea pintà na bissa en cada brasso e una ntel col. Go fin ciapà paura.
– Si, si. Gràssie a Dio che i la ga finia. E la to visigna, la Clotilde, go savesto che no la stà mia tanto ben!
– Gheto mia savesto gnente, comare?
– Nò, parché?
– La ga bio un ABC.(avc)
– Maria Santìssima!
– La ga fin perso la parola. E me par che la fà anca fadiga de mover i brassi e le gambe. Se go tempo, doman vao catarla.
– Alora dighe che ghe mando un saludo e vao farghe na novena ala Madona dela Salute che quela là la me ga sempre atendesto. Ben, adesso me toca ndar parché ghe go dito al me omo che ndea spetarlo là ntela redoviària.
– Alora, ciao comare, e no stà mia desmentegarte de mandarghe un saludo ala to visigna la Clotilde.
– Ghe lo mando, si, comare. Ciao e stame ben.
– Altrotanto anca par ti. Ciao.
