Un dotoreto, pena vegnesto fora dela Facultà, el ze ndà laorar nte una pìcola cità. La prima roba che el ga fato, el ga mestesto su na farmàssia parché non gne’era gnanca una. El poblema ze che quando la gente i gavea qualche malatia, i gavea el costume de bever sià de tuti i tipi. I se fea i so remèdii casieri.
El dotoreto el ga visto che cossita nissuni i ndea comprar ntela so famàssia. Alora, el ga pensà na maniera de modificar el costume dela gente.
Al primo che el ze ndà consultarse, el dotoreto, dopo de farghe araquanti esami, el ga visto che zera ora de scominsiar de meter lo so idea a funsionar e el ghe ga domandà:
– Fùmito tanto?
– Ah, na cartera al giorno, dotor.
– Alora bisogna che te assi là de fumar se te vol viver tanto.
– Ma dotor, mi go belche proà farme sià de tute le erbe e no ga adiantà gnente.
– Bisogna che te assi de bever sià e vai ntela farmàssia che ghe ze un remédio par dassar de fumar. Basta de doperar remèdii de casa. E vin, ghin bévito tanto?
– El vin el ze el me Dio, dotor. Par dir la verità, na ciucheta al giorno. La fémena la ga proà farme sià de na mùcia de erbe e no ghe ze cristi de esser bon de dassar de bever.
– Go belche dito, che non adianta bever sià de gnanca un tipo. Dopo te dao na risseta, te vè là ntela farmàssia che ghe ze un remédio par quili che i ga el vìssio de bever tanto. E come che la va col sesso?
– Ah, là casa, dotor, ciare volte. Fursi na volta al mese.
– Segnor benedeto! Na volta al mese? Sito drio bever qualche roba par darte forsa e coraio?
– Bevo diversi sià casieri che i mei amighi i me ga racomandà. Magno mandolini, cicolate, bevo bira negra e altri potaci, ma, fin adesso, no go sentio difarensa gnanca una.
– Quante volta bisogna dirte che remèdii casieri no i val gnente.
Ntela to età, se te vol restar meio de tuto e spessialmente far tanto sesso, mai doperar robe de casa e gnanca remèdii casieri. Gheto capio?
– Si, dotor. Vao scominsiar ancora incoi.
– Va ben. Ze ora de finirla co’stì remèdii casieri.
– Si, dotor, gràsie par le orientassion.
El ga ciapà, el ze ndà casa tuto contento e el ghe ga contà ala so dona cossa che el dotor el ghe gavea spiegà.
– El me ga racomandà che mai doperar remèdi casieri e far tanto sesso se vui restar meio.
Alora, el ghe ga dito ala fémena che el volea scominsiar súbito e parquela el ze ndà tomar bagno.
Ciò, la fémena, tuta contenta anca ela, quando che la ga visto che el so omo el ze vegnesto casa con tuto quel morbin li, la se ga enfeità come na regina: la se ga passà profumo da par tuto, glostora, la se ga pintà i làvari de rosso, le se ga metesto su el meio “baby-doll” che la gavea e la se ga butà ntel leto par spetar che l’omo el vegnesse fora dela stansa del bagno. Ma quando che lu el ze vegnesto fora, el ga gnanca vardà la so fémena là butada ntel leto. El ga scominsià vestirse cole meio robe de festa. Fin la gravata el se ga metesto su. Alora, la so fémena la ghe ga domandà:
– Ciò, negro, sito drio vestirte de festa parché?
– Gheto mia capio cossa che el dotor el ga racomandà?
– Si che go capio. El ga racomendà che te toca far tanto sesso, parquela che son qua pronta.
– Ah, nò, cara. El dotor el ga dito che bisogna mai doperar remèdii casieri.
Induvinela dela stimana
Cossa zela na roba che tuti i ghin’à due, ti te ghin’è una e mi no ghin’ò gnanca una?
Resposta: La letra T
