Ntela seconda domènega del mese de Agosto, se fà la comemorassion del giorno dei pupà, el giorno che i fioi i ghe manifesta tuta la sua afetività.
Ma, vui dir che no i ze mia tuti i fioi che i ghe dà el valor che el se mèrita un pupà ntela fameia, parché, sti di indrio, go scoltà na fioleta che la ghe parlea ala so mama e la ghe dimandea cossita:
– Mama, mi go scoltà la professora che la ga dito che l`è stà el Signor che el ga fato el mar, le piante, el sol, la luna, le stele e che el ze stà Lu che el me ga creà anca mi. Zeo vero, mama?
– Si che ze vero, cara nina. El ze stà el Signor che el ga fato tuto el mondo e che el te ga fato anca ti.
– Vui saver anca se ze vero che el ze el Pupà Noel che el me porta i presenti quando riva el giorno de Nadal?
– Ma si, cara fioleta. Tuti i presenti che te guadagni de Nadal ze el Pupà Noel che i te li porta. E anca quando che riva la Pàscoa, ze el conìcio che el te porta i ovi de cicolata.
– Zeo vero, mama, che quando mi perdo un dente e che lo meto sora la finestra, la striga la vien portarme soldi?
– Ma si, cara, ze tuto vero.
– Mi volea domandarve nantra roba, mama:
– Te pol domandar, si, fiola?
– La nona la me ga dito che quando mi son nassesta, la ze stata na sicogna portarme qua casa. Zeo vero, mama?
– Si che ze vero, fiola. Un bel giorno de sol, na sicogna bela, bianca, la ga passà qua casa zolando. La gavea na sporta picada ntel beco e ti te zeri rento ntela sporta e ela la te ga assà qua ntela nostra fameia.
– Ma, alora, mama, el pupà sèrvelo pa far cossa qua casa?
– Adesso, basta de dimande, fiola e ciapa la scoa e vai scoar la cosina.
– Ma mi volea dimandarve sol nantro roba, mama!
– Ma cossa vuto saver, adesso?
– La professora la ga dito che noantri semo vegnesti de Adamo e Eva!?
– Ma càtito che noantri semo vegnesti de onde?
– El pupà el ga dito che semo vegnesti dei macachi!
– Bon, ma quela la ze la fameia del tuo pupà. Adesso basta.
