Ghen’era, na volta, un toseto che el zera pròpio desfacià e anca dispetoso. El ghe piasea de farghe dispeti ai altri e anca ala so mama e al so nono. Tute le volte che el zera in meso ala gente e che ghe vegnea voia de pissar el ghe osea ala so mama, ma el osea ben forte par tuti scoltarlo:
– Maaama! Go voia de pissar!
La mama, che la zera professora, la restea tuta invergognada in meso ala gente, spessialmente se fusse nte un posto delicato. Alora la ghe insegnea al so fioleto:
– Ma nò far cossita, Zilberto! Nò osar forte che tuti i te scolta e resta bruto. Scolta qua, quando te ghè voia de pissar, ciama la mama e dise cossita: “Mama, go voia de subiar”, che alora resta anca bel par la gente che scolta.
Ntela stimana drio, la mama col so Zilberto i ze ndai trovar el nono e la mama sempre atenta par che el Zilberto no’l fesse dispeti e gnanca dir parole brute darente el nono. Ma, al mesodì, quando che i zera in tola drio magnar, ghe ze vegnesto voia de pissar al Zilberto. Alora, lu el se ga ricordà dele parole dela mama e el ga osà:
– Mama, go voia de subiar!
El nono, che el ghe volea tanto ben al so nipote e che el ghe fea tute le volontà, quando che el ga scoltà che el so nipote el gavea voia de subiar, lo ga ciapà in brasso e el ghe ga dito:
– Vien qua, Zilberto. Se te ghè voia de subiar, te pol subiar qua ntela rècia del nono.
Alora, la mama la ga dato un salto e la ga dito:
– Pamor de Dio, Zilberto. Vai subiar là fora, che el nono no’l ghe piase mia de bordel.
La mama no la volea mia che Zilberto el ghe impienisse le rècie del nono.
Sol par rider
Una note, tre ciuchi i ze vegnesti fora dea bodega, ma de tanto storni che i zera, no i savea gnanca la strada par ndar casa, alora i ga ciamà un uber.
Par ndar rento ntel auto i ghe ga metesto quìndese minuti. Pena che i se ga postà ntei assenti, i ga tacà dormir e roncar. El sofero, che el zera belche nervoso, el ga pensà intrà de lu: adesso ghe la fioco. El ga impissà el auto, lo ga assà funssionando due minuti e lo ga smorssà e el ghe ga dito:
– Pronto! semo rivai!
– El primo che el ze ndà zo, el ga pagà e el ze ndà via.
– El secondo, el ze ndà zo e el ga dito:
– Cramento!, Sta volta si, semo rivai presto.
L’ùltimo el ze ndà zo cativo e el ga dito:
– Zele maniere de corer? Go gnanca fato ora de far el me soneto, porco can.
Induvinela dela stimana
I ze tre fradei: el pi vècio el ze belche morto; el secondo el ze vivo e l’ùltimo e ze gnancora nassesto.
Resposta: futuro, presente e passado
