Matina bonora, ancora scuro, done con salute, de spale grande e brassi forte, come de un omo, le se metea in viaio. Banda de là, done dela elite porto-alegrense le spetava. Le pagava un prèssio alto par proveder el late materno.
El grupo de fémene travessava la madrugada nte na longa caminada, adrio la trilia dei troperi e i mascate serani, ntela diression del sul fin la sede del munissìpio de San Sebastion del Caì, ndove le assea i cavai ntela stala del aleman. Montea su nel vaporeto che sbrissiava sora le àque turbie del rio Caì, ndea rento ntel grando rio Guaiba, in diression a la capital. La ciesa su, del alto dela colina dominava el paesagio. Ntel mar de áqua del Guaiba ghe vignea la ricordassion dela travessia del atlântico. Le làcrime nunsiava el ricordo nostálgico dela fameia che ze restata banda de là del Atlàntico.
Cosa ndea far ste done ntela capital cosi bonora? Le done de pèti grandi pieni de late le gavea la funssion de derghe de ciucar ai tosatei dele done siore de Porto Alegre.
El capo dei camerieri, in pie, davanti de na carossa tirada par due cavai, le spetava nel porto dei casai. El veicolo negro con i banchi de veludo pùrpora menea ste done ai casaroni banda la piassa sentral, ndove stea le fameie, elite de poder dela capital. La acolienssa dele done zera de lusso. Le zera menae ai còmodi dela amamentassion. I ghe portea i tosatèi e lore ghe dea de ciucar. Questo ritual zera fato quatro olte al di. el durea due giornade. Zera el tempo che le stea là. Quando finia el laoro le guadagnava i soldi e le scuminsieva el retorno a casa. El barco a vapor sbrissiava come na flessa sora el àqua del afluente del Guaiba, fin el porto de San Sebastion del Caì.
Nela casa di riposo del alemàn, le prontava i cavai par el retorno. Zera un posto che rivea persone de tute le bande. Cada un con la so pròpia maneira de parlar. Zera una Babel banda el rio. Viagianti, troperi mascati de tute le lèngue se inmuciava ntel pìcolo porto fluvial. Le done Venesiane, mese con timidessa le ris-ciava un ócio. Le galanterie dei omi biondi e mori zera tanti. El ritorno zera na alegressa, na selebrassion dele done e la ventura ricompesada, con i soldeti in scarsela.
El troto dei cavai, sulcava la trìlia del retorno del giro del sol e de una luna.
Se la naturesa la era pròdiga e intocata fin che la ora li, el imigrante nol ga spetà che la ghe desse de tuto. La dona ntel so ritiro silencioso, scampada via del so casulo e ndata a la luta.
Baseada na crônica de Plinio Mioranza
“O Segredo do Casulo”
