Nte un pìcolo convento de móneghe, ghen’era la Madre superiora che la zera cativa che gnanca na brespa rossa. Le moneghete, pore can, le gavea na paura de la Madre che le se spelea tute.
Na matina bonora, tute le moneghete, belche levade su del leto, le zera drio prontarse par la messa.
La Madre superiora la ze stata la prima a levar su tuta contenta che mai. Co la se ga catà cola prima monegheta ntel coridor, la ga saludada, ridendo:
– Bon-giorno, Maria do Rosàrio! Che bela giornada che’l Signor el ne ga mandà incoi!
La monegheta la se ga fin remirà de veder la Madre contenta de quela maniera lì parché la zera costumada de véderla sempre cativa, ma la ga sbassà zo i òcii e la ga tacà rider e la ze ndada via.
De la de na s-cianta, la Madre la se catà con nantra monegheta e la ghe dize ridendo:
– Bon-giorno, Maria de la Bonaventura! Che bel giorno de sol par cantar lodi al Signor.
La monegheta la ga fin ciapà un spauron de veder la Madre contenta così. La ga sbassà zo i òcii e la ga tacà rider.
Quando la suora Maria Conceta la se ga trovà cola Madre Superiora ntel coridor e che la zera drio cantar a mesa vose, la ga pensà intrà de ela: cossa gavarala la Madre incoi che la ze tanto contenta? Ma quando che la ga vardà in zo e che la ga visto le sinele dela Madre, la ga tacà rider anca ela.
Ciò, la Madre la ga catà de strànio che quando che la saludea le moneghete e che le sbassea zo la testa, le scominsiea a rider. Quando che la se ga catà cola suora Càrmine, che la zera un pochetin pi vècia, la ghe ga dito:
– Bon-giorno suora Càrmine. Incoi mi son tanto contenta che mai. Ma dime sol na roba: parché che tute le moneghete che saludo, le varda in zo e le scomìnsia a rider?
La suora Càrmine la ga vardà i zo e la ga tacà rider anca ela e la ghe ga respondesto:
– Cara Madre, le ga ridesto parché le ga visto che ve gavì metesto su, ntei pié, le sinele del Padre Capelon.
Quando che la Madre la ga visto che la se gavea metesto su le sinele del Padre Capelon, che el dormia ntel convento, la ga sol dito cossita:
– Maledeta prèssia!
