Due gaussi che i zera ntel velório, costumai con casi de sta naturesa i ga compagnà tuto el bacan. Lora, i ga tolto su sto morto che el zera rento nte un bigùncio, lo ga messo ntea besta e i lo ga portà direto ntel simitero. Quela note pròpio lo ga interà c’na serimònia simplise, sol con due trè parenti dela fameia. Quei pi darente, i ga dito un per de orasion in latin, cantade par el pi letrado del grupo, el sacrita Domenego, pena rivà del seminàro dei lassalista dela cità de Canoas. Lora, lu el savea tute le funsion in latin, el ga fato la despedida del soldà.
Par um bel poco de tempo pi nessuni passea davanti del semitero dopo che scuria. Le persone la in volta le disea che i vedea na mula menada par un omo c’na capa negra portando un corpo sensa testa. Ma tanti i disea anca che zera el capoto che se verdea col vento, e anca el troto dela mula cuerdea la testa de sto morto e che el parea che no la gavesse mia. Tuti i contea la stòria dela so maneira, cada un zontea un poco depi. Par ani la ze stata contada e recontada e cosi ga fenio la stòria del velório de um soldà che ga mia fato ora ndar la guera e che el ze morto de na malatia strania, che i gavea mai sentio parlar ntei baranchi del rio dea Zanta.
Queste storie le zera contae sempre de note ntei filò. Ma, sto filò el ga mia resistio quando ze rivà la television e la comunicassion com le imagine. Le stòrie che i contea zera acontesimenti dei tempi pi antiqui, dei so antenati, come le lengue de fogo che saltea fora dele tombe de note, i dispeti del Sanguanel e la maioransa zera de acontesimenti intanto el velòrio che el zera fato ntele sale, sora due trè caregue o na tola, fin che el casson restea pronto e tante volte le case zera mia tanto forte, tochea pontelarle. Anca zera el costume de far un retrato del morto lu sol o con la fameia. Passar davanti el semitero de note zera sempre un perìcolo. E ancora toca pensarse che no ghe zera mia luce e la criatività se mescolava con la paura e vegnea fora stòrie che fea i cavei restar in pie e sgrisoloni par el corpo.
Ma come ga dito Plinio Mioranzza, Questa stòria ze stata contada ntel ùltimo FILÒ. Qualcheduna salvada ntei libri, parche la generassion che gavea la oportunità de scoltar i noni, no i ga mia bio tempo, zera ora del notissiario e dela novela.
