Adesso che ga scominsià la campagna política, me go ricordà de una stòria da ani indrio.
I conta che quando che el nono el ga sentio che l’era belche drio morir, el ga volesto parlar cola nona parchè el ga sempre bio na pìcola sconfiansa. Alora el ghe ga dimandà cossita:
– Varda, vècia, mi non vui mia morir sensa dimandarte na roba.
– Si, si, vècio, te pol parlar. Cossa vuto saver?
– Mi vui che te me disi la verità: quante volte che te me ghè tradio?
– Maria Santìssima, vècio, cossa sito drio dir?
– Dime la verità, vècia, parché se te me conti busie, dopo che son morto vegno tirarte par le gambe parché ghen’è stà tanta gente che i me ga parlà che te me ghè metesto i corni.
– Ben , ben, vècio, se te disi che te vien tirarme par le gambe, alora mi te conto la verità: te go tradio solo in tre oportunità.
– Savea mi che la zera cossita! Quanta gente che i me parlea e mi no ghe credea. Bruta sensa vergogna, de na putana… Mi là pacìfico coi corni longhi e tuti che i me ridea drio… Adesso si me toca morir dal bon…
– Pian, vècio, pian… No stà lamentarte cossita, parché tute le volte che mi te go tradio, te go tradio sempre par amor.
– Come cossita, par amor?
– Speta che te conto: la prima, ze stata quela volta che te volei el aumento del salàrio ntela fàbrica e che no ghen’era maniere che el paron el te desse l’aumento. Alora mi son ndata parlar col paron e lu el me ga dito che el te dea l’aumento del salàrio se mi ndesse ntel motel insieme con lu…
El nono el se ga conformà un pochetin e el ghe ga respondesto:
– Ben, par questa volta dà par perdonarte parché el me ga dato un bel aumento. E dopo?
– La seconda volta, vècio, la ze stata quela volta che i te ga ciapà ndrio sfrugnar ntei papei de l’escritòrio e che i te ga acusà che te zeri drio robar. Alora son ndata parlar nantra volta col paron e lu, par perdonarte, el me ga impegnà nantra volta par ndar ntel motel.
– Maria Vèrgine, che brute robe che me toca scoltar vanti de morir.
– Pian, vècio, pian…E la ùltima, la ze stata quando te zeri candidato a vereador e che te me ghè dito che, par le conte che te gavei fato, ghe manchea sol vinti tre voti. E alora, te pol saverla che i vinti tre voti son stata mi conquistarli e par quela che te ghè guadagnà i giusti vinti tre voti, te recòrdito?
Alora el ze stà el colpo che el vècio el ga batesto i stivai…Ma la zera pròpio bona de voti, èh !? Ncora ben che ghe manchea sol vinti tre…
