El nono e la nona i ze ndai far na vìzita al zoolòzico par veder le bèstie, e el nono, che el zera belche ndà ntel Zoolòzico diverse volte, el ghe spieghea tuto a la nona:
– Varda, nona, quel là el ze el coatì; i dize che el fà l’amor due volte al giorno.
– Maria Santa. Che difarensa de noantri due…
– Quela là – ghe dizea el nono – la ze la zaguatirica. I dize che la fà l’amor anca tre volte al giorno.
– Madona! Altro che noantri due, nò nono?
– Quela là, la ze la zirafa; i dize che la fà l’amor due volte a stimana.
– Segnor benedeto. Con quel col longo li?! Come cossita?
E el nono el continuea:
– Quel là, el se ciama de leonfante. I dize che el fà l’amor na volta al mese.
– Benedeto Santo! Con tuto quel peso lì? E pensar che ti no te pesi gnanca sessanta chili, nono?!
El nono el zera tanto intusiasmà che no l’scoltea cossa che la nona la zera drio parlar. E cossita i ga seità passar tute le bèstie e sempre cola medèsima litània. E par ùltimo, i ze passai davanti el rinosseronte e el nono el ghe gà dito ala nona:
– Varda, nona, quel là el se ciama de rinosseronto e i dize che el fà l’amor sol na volta a l’ano.
– Eco mo. Ze par quela che el gà i corni fin ntel naso.
