Sti ani, ghen’era un talian che stea là zo drio el Rio Turvo. El zera un talian de quili che no i vol savérghene se zera proibio de trar zo pini, copar bèstie e taiar piante. El fea quel che ghe parea lu. Solche el gavea un visin che el gavea invìdia e el ze ndà denunssiarlo.
Un bel giorno, ze rivà là un fiscal del Ibama. Ma par che el talian no’l ciapasse mia paura el se ga mia apresentà come un fiscal par veder se l’era bon de tirarlo in giro. El fiscal el gavea na sciopa e el ga fato finta de esser un cassador.
– Bon giorno, talian! Come che la va?
– Bon giorno, bon giorno. Par mi, qua, la va sempre meio.
– Go sentio dir che, zo par de qua, ghe ze tanta cassa. Zeo vero?
– Dà par dir che ghe ze ancora abastansa, parché ze tempo che no vedo cassaduri vegner zo par de qua. Stimana passada go copà due viadi e na cutia. – El ga ciamà el fiol e el ghe ga dito: – Fiol, vai tor le teste dei viadi e dela cutia par l’omo veder che son drio parlar la verità.
De la de due minuti, el fiol e riva là cole teste dei viadi e dela cutia.
El fiscal el ze restà de boca verta de veder le teste dele bèstie morte e el volea belche darghe òrdine de preson. Ma el ga pensà de spetar nantro pochetin par veder cossa che vegnea fora.
– Geri l’altro – ga continuà el talian, – go copà quatro tatu e na capivara. – Fiol vai tor le teste dei tatu e dela capivara par che l’omo el vede che son drio parlar la verità
El fiscal, robe che el devente mato de veder le teste dele bèstie morte. E par insentivarlo a contar tuto, el ghe ga domandà:
– E osei, ghen’eo ancora tanti?
– Osei?! Maria Santìssima! Ghen’è ancora a balochi. Sabo passà, go copà trenta due colombe, vinti e due turdi, trèdese beca-soche e due tucani. Go fin invità i amighi e gavemo magnà na oselada che mai. – Fiol, vai tor le teste de araquante colombe, de turdi, de beca-soche e dei tucani che le ga de esser picade ntela serca, par che l’omo el veda che son drio parlar la vcerità.
El fiscal, ciò, el zera belche rosso de nervoso de scoltar tute quele robe lì. Ma vanti de darghe òrdine de preson el ghe ga domandà:
– Ma no ga mai aparessesto gnanca un fiscal del Ibama qua?
– Fiscai del Ibama? Ghen’è belche vegnesto due fiscai qua. – Fiol, vai tor le teste dei fiscai par che l’omo el vede son drio parlar la verità.
Ciò, quando el fiscal el ga sentio el talian parlar cossita, el ga ciapà la pi curta e, mi cato, che el ze ancora drio corer.
