Quando se dise che i taliani i zera de tanta fede, ze vera! Ma nò tuti!! Tanti gavea rabia dei frati o dei Preti. E questi i fea un strago ntela comunità. Come la stòria de Sabadini, che el ga proà lassar el vescovo.
Adesso gue conto come ze stà. Mi go mia visto, ma go ledesto sora sto caso, ntel libro de Boscatto e anca me pupà Jaime Calza lo contea sempre.
Sto sabadini, zera um omo che gue piasea tanto de cavai e sempre ben ornamentai com tuti i pareci che gue volea. Lasso, boleadere e lu sempre cole vestimente de gausso, de bombacie, stivai e spore e tuto altro. Come un vero gausso!
Um bel sabo, la vila de Noa trento zera tuto ornà, com bandierete de carte, picae con barbante de saco, che stravesea la rua Dr. Parobè (antico nome dela Av. 25 de Julio), com arqui de legno pieni de fiori e tuta la populassion premosa par spetar el Vesco Don Claudio Ponce Leão, che vegnea de Antonio Prado par far la Cresma dei tosatei Catòlichi.
Quando la comitiva de recepession e el Vesco ze rivai, ntel cruzamento dela rua John Kennedy co’la Dr. Parobé, salta de in meso la rua Sabadini, cola armadura del lasso pronta, belche par ària, ga dato la lassada co’ na gran maestria de gaudèrio. El Vesco co’ lasso intorno el col, le’stà pi svelto ancora. Me par de veder un filme de Indiana Jones, (che el nome saria “La maladission del Vesco”) El ga fato ora de libertarsse del lasso. Ma i ga dito che le sta par um tris. Sabadini gavea idea de strassinarlo ntele rue dela vila (come ntei filme faroeste).
Quando Sabadini ga visto el so plano ndar soto àqua, batesto les spore ntel caval e scampà in disparada. No ocorea gnanca corer tanto, parche nessuni se ga movesto par dargue drio. In final, i dise che no i lo i lo ga pi visto quà Noa Trento.
Ma, ga mia fenio la stòria. El vesco co na ràbia de far lampo, ga piantà su na maladission a Noa trento, che par cinquanta ani no ndea a vanti. Verità o nò, i dize che par sinquanta ani, Noa Trento no le ndato mia avanti pròpio. Gnanca cola emansipassion.
Passà i sinquanta ani ga scuminssià vegner un per de indùstrie. Poro Noa Trento!
El guinà passà gran tante vanti restar bel cosi. E pensè valtri che ze stà sol che la maladission li? Nò!! Pi avanti mi gue conto altre! Se fusse oncoi se disea che “Noa Trento ze stà el ezempio dela Resistènsia”.
