Na volta ghen’era una mónega che la volea ndar catar la so mama che la zera de star là su a Santa Catarina, ma no la volea mia guastar soldi co l’ónibus, alora, la ga pensà de tirarse drio la strada e spetar che qualchedun la tolesse su.
Dopo de na mesa ora che la zera là drio spetar, ga capità un sofero qua del Rio Grande che ndea su a San Paulo e come che el zera un católico, quando che el ga visto la mónega la drio la strada che la dimandea carona, el ze restà contento de aver la gràssia de iutarla. El ga fermà el camignon e la mónega la ze saltada su.
El sofero el ze restà squasi imbambio de veder che el gavea na mónega insieme con lu ntela gabina. El ghe ga dato sol un bon giorno e no’l ga pi verto la boca par parlar con ela. E la mónega, quando che la ga visto che el sofero el zera tuto invergognà, gnanca ela no la parlea gnente. I ga viaià tuta la strada, sensa parlarse. Dele volte i se dea na pìcola vardada e basta.
Dopo de due, tre ore che i zera drio viaiar, i ze rivai nte un pìcolo povoado de Santa Catarina, onde che la mama dela mónega la zera de star. Alora, la ghe ga dito al sofero:
– Te pol fermarte, che la me mama la ze star qua.
El sofero el ga fermà el camignon, ma vanti de saltar zo, la mónega la ghe ga dito:
– Mi volea ringrassiarte tanto dela carona che te me ghè dato, ma mi volaria, almanco, saver el to nome parché, tute le note vanti de ndar dormir, vui pregar al Signor che el te dae tanta salute e el te iute sempre.
Alora, el sofero el ze restà contento de veder che la mónega la volea saver el so nome, el ghe ga dito:
– Cara, ze fàssil ricordar el me nome parché, son sicuro, che el me nome el ze compagno de na roba che tute le note, vanti de ndar a leto, la cipé in man.
Ciò, la mónega la ze restada fin rossa e la ghe ga dito:
– Son sicura che vao ricordarme, si. Ciao e gràssie, seu Pinto!
– Nò, nò, cara. Mi cato che me gavì capio mal. El me nome no’l ze mia Pinto, el me nome el ze Rosàrio.
Èh che el sofero el pensea che vanti de dormir, la mónega la ciapasse in man la corona par dir su el rosário. Ma, el se ga sbalià de tanto.
Induvinela dela stimana
Un caval el ga quatro feri. Tre cavai, quanto feri?
Resposta: 01 fero sol, parché se te ghin cavi tre, resta 01
