Da ani indrio, quando che’l prete ndea dir la messa ntele capele, ndea sempre a caval parché no’l gavea mia auti come incoi.
Sucede che el caval del prete, stea sempre ligà nte un pìcolo coerto darente la ciesa e de tanto scoltar le preghiere, el savea de mente el Padre Nostro e anca la Ave Maria. Se pol dir che quel caval l’era depì cristian che tanti catòlichi.
Dele volte, el prete el se menea adrio anca el sacristan par responder la messa che, ne quel tempo, la zera dita in latin e ntele capele, no ghen’era nissun che savesse latin.
Na doménega, el prete e el sacristan i se ndai dir la messa ntela capela Sant’Antoni e bisognea travessar un rio, che no l’era mia tanto grando, ma quando che piovea tanto, el zera pericoloso.
Sucede che quando i zera drio dir a messa, ze vegnesto su un temporal de trar zo el quèrcio dea ciesa. Parea fin che i àngeli i se gavea deventai rabiosi e i zera drio trar zo àqua a sécie raverse.
Ben, dopo che i ga finio de dir su a messa, el prete e el sacristan i se ga inviai par ndar casa, ma quando che i ze rivai là darente el rio e se ga spaventai de quando che l’àqua la zera vegnesta su. Ma come che el caval e zera costumà atravessar el rio i ga riscià. El prete davanti e el sacristan ntea garupa. Ciò, quando che i ze rivai maisomeno ntela metà, el caval mal e mal che el ghe rivea cole sate ntel fondo. El sacristan, robe che el devente mato. El ga tacà dir su el rosário. Alora el prete el ghe ga osà:
– Pamor de Dio, tasi su! No stà pregar el Padre Nostro e gnanca la Ave Maria, che se el caval el te scolta, el se indenòcia e el ze el colpo che ndemo soto àqua tuti tre.
Presentasion a Fecouva
No sté mia.perder el show del Grupo Ricordi ntela abertura dela Fecouva nel giorno 20, ale oto e mesa de note
