Sti ani, quando che i se maridea, no l’era mia come che el ze el giorno de incoi, nò. No i savea gnente, ma gnente pròpio. No i savea gnanca come far fioi. E, par quel tanto lì, ghin sucedea tante stòrie. E questa stòria la ghe ga tocada a un che stea la zo darente el Rio da Zanta.
Un giorno el se ga maridà e come che el se gavea fato su na caseta, el ga menà casa la sposa e el sogro e la sogra i ndea farghe na vìsita una volta al ano parché i zera de estar distante, ntel campo, là darente Vacaria.
Speta un ano, speta due ani e gnente. El sogro e la sogra i zera premosi parché i volea un nipote. Alora, un giorno che i sogri i ze ndai catarli el pupà dela sposa el ga ciamà la fiola e el ghe ga dimandà:
– Ciò, fiola, gavio mia idea de qualche fioleto, dele volte?
– La idea la gavemo noantri, pupà, ma me par che lu no’l sà mia come che se fà par far un fiol.
– Alora, àsseme a mi, fiola, che el mese che vien, na doménega, vegnì trovarne e femo un surascheto là casa, che mi ghe spiego tuto.
Co ze rivà la doménega, i ga fato el surasco come che i gavea combinà, tuto polito. Pena finio de magnar, el sogro el ga convidà el so zénero par far na caminada, ndar veder i porchi, la stala, i conìcii, le vache ntel campo, la piantassion de mangioca e tuto quanto.
Quando che el sogro el ga visto che i zera sol lori due, el sogro el ghe ga dimandà al zénero:
– Ma ciò, zénero, saria mia ora de qualche fioleto?
– Ah, gavaria tanta voia mi! Par intanto semo drio dormir insieme e semo drio spetar. Tute le note mi prego al Signor che el me mande un fioleto
– Si, ma seto, almanco, come che se fà par far um fiol?
– Mi no sò mia. La mama la me ga dito che zera par ndar dormir tute le note insieme cola me sposa. Sol quela, la me ga dito. Nissun me ga mai insegnà gnente sora quel laoro lì.
– Ma Dio Santo, fiol, gheto mai visto i can come che i fà?
– Si che go visto…
– Ma alora, fiol, stà atento e varda ben come che i can i fà. Ze sol far compagno. Te vedarè che de qua un ano te gavarè un bel fioleto e noantri gavaremo un bel nipote.
– Àsseme a mi, sogro, àsseme a mi…
Dopo de due mesi, maisomeno, el pupà el ga catà la fiola e el ghe ga dimandà:
– E alora, fiola, quelaltro galo imparà come far fioi?
– Pupà, adesso la ze pedo che prima. Tute le note, quando che el riva ntel quarto, el cava zo le braghe, el alsa su na gamba e el pissa ntea parede.
Eco, pò. El sogro el ghe ga spiegà che zera par far come che i fea i can…
