I conta che, sti ani, ghe nera un pastor protestante che el gavea un fiol de quili moderni: cavei longhi che gnanca quili de na dona, un recin in cada récia, nantro recin picà ntel naso, un recin picà fin ntel boton dea pansa e el gavea na barba longa come quela de Moisés.
Sto fiol, tuti i sabi lu ndea sempre dimandarghe al so pupà che el ghe imprestasse l’auto par ndar in volta, ma el pupà el ghe disea sempre cossita: sol dopo che te compissi i disdoto ani.
Quando che el ga compio i disdoto ani, al sabo el ze ndá dimandarghe imprìstio de l’auto a so pare parché el se gavea catà na morosa e el volea farse veder che el gavea un auto. Alora el pupà el ghe ga dito:
– Se te vol che te impresto l’auto, mi te lo impresto, ma bisogna che te fei tre robe: la prima roba, bisogna che te vei taiarte che i cavei lì ben curti ;la seconda, bisogna anca che te vei taiarte quela barba lì e la tersa roba, bisogna che te sìpie aprovà ntel vestibular ntel fin del ano.
El fiol, ciò, el se ga metesto studiar di e note che gnanca un mato e ntel fin del ano el ga passà ntel vestibular.
Quando che el ga savesto che el gavea passà ntel vestibular, al sabo el ze ndà parlar col pupà:
– Pupà, go na notìssia bona par contarve.
– Che notìssia, fiol?
– Go passà in quarto posto ntel vestibular. E incoi, che ze sabo, son vegnesto qua par dimandarve imprìstio del auto par ndar a morose.
Alora el pupà el ghe ga respondesto:
– Te recòrdito, fiol, che mi te go dito che par imprestarte l’auto ghe volea che te fessi tre robe: taiarte via che i cavei longhi lì, taiarte via la barba longa e te tocaria passar ntel vestibular. Fin adesso te ghè sol passa ntel vestibular. Ghe manca due robe: taiarte i cavei e la barba.
Alora, el fiol el ghe ga dito a so pare:
– Ma pupà, vu che sì un pastor, gavì de saver che la Bìblia la disse che anca Moisés el gavea la barba e i cavei longhi!
– Ben parquela che so pare el ghe ga mai imprestà l’auto e Moisès el ghe ga tocà ndar par el deserto e atravessar el Mar Vermelho a pié.
