Zelindo el volea catarse fora na morosa parché el gavea belche vinti quatro ani, ma so pupà e so mama no i volea mia che l’ndesse ai baili parché i disea che i baili i zera robe del demònio e no l’era mia un posto de cartarse fora na fémena par maridarse.
Ma, un sabo i ga inventà de far su un bailesigno ntel salon dea ciesa. I ga contratà el gaitero e tuto quanto. Tuti i parlea de sto baile. Gnanca le galine no le stea casa, sol Zelindo, poro can, nol podea mia parlar parché so pare el ghe disea su.
Sucede che Zelindo el gavea un fradel de quìndese ani che el gavea nome de Azenor e i dormia insieme ntel medèsimo quarto. Bisogna dir che ne quel tempo là, le case no le gavea mia el sofito e quando che i vardea in su i podea veder le télie dela casa. Alora, Zelindo el ga combinà col so fradel e i ga fato finta de ndar dormir pi bonora par imbroiar so pare. Quando che el ga sentio che el pupà e la mama i zera belche drio dormir, el ze ndato in sima de una carega, e come che el gavea un metro e novanta due el ga bio la sorte de rivarghe cole man ntel coerto. El ga cavà via araquante télie e el ze saltà fora par el buso e el ze ndato al baile. Non so dir, magari, se el se ga catà la morosa.
Dopo che l’è ritornà del baile, el ga ciamà so fradel che el ghe verdesse la porta e el ze ndà dormir pacìfico, ma el se ga desmentegà de sarar el buso ntele télie.
El giorno drio, quando che so pare el ga visto el buso, robe che el devente mato. El ga volesto saver chi che lo gavea verto. Alora, Azenor el ghe ga contà tuta la stòria.
El pupà el ga ciamà Zelindo, el ghe ga dito su na sbranca e, par sora, el ghe ga passà la sintura e lo ga mandà sapar in colònia, seben che fusse doménega.
Adesso, al pupà el ga pensà che bisognea tratar de sarar el buso parché el tempo el zera meso de piova, ma el poblema ze che no i gavea mia scala. El ga proà ndar in sima dela carega, ma no’l ghe rivea mia parché el zera massa basseto, un metro e sessanta. Come che el zera un omo magreto, ma che el gavea na fémena ben reforssada, pi larga che alta, la ga ciamada là par iutarghe sarar quel maledeto buso ntel coerto dela casa.
El ze saltà in sima dela carega e dela carega el ze ndà in sima dele spale dela so fémena. Ma giusto nte quel momento che el zera là in sima dela fémena, ga capità el visigno. Alora, Azenor el ze ndà riceverlo.
– Bon giorno, Azenor!
– Bon giorno, visigno!
¬ Sito casa ti sol? Onde zelo Zelindo?
– Zelindo el ze là in colònia drio sapar.
– Madona! Drio sapar ala doménega? E to pare, zelo onde?
– El pupà el ze là ntel quarto in sima dela mama, adrio stropar el buso par onde ze vegnesto fora el me fradel
El visigno no’l ga pi volesto savérghene de gnente. El ga gnanca desmontà zo del caval. El ga fato a volta e el ze ndà casa contarghe la novità ala so dona.
Induvinela dela stimana
Cossa zela na roba che la ze stata fata par i òmeni e l aze in paradiso?
Resposta: Le piaghe de Gesù Cristo
