Parla Talian: Sospeta dela so D ona – Toni Sbrotolon

0

– Cossa gheto, Bepi, che te sì sèrio cossita?
– Ze par via che go na mesa sospeta cola me dona…
– Va là, Bepi, ti te sì sempre cola medèsima idea in testa: sconfiansa dela dona…sconfiansa dela dona…
– Ma la me sospeta la ghe ze dal bon, compare, parché, l’altro di son ndà casa dea firma un pochetin pi bonora. Co mi zera distante un tresento metri, go visto che ghen’era un omo strànio drio ndar fora par el portel a passi larghi.
– Si, ma pol esser che l’era un amico tuo!
– Amigo mio, nò, parchè no lo go mai visto. Ghe go dimandà ala dona e ela la me ga dito che el zera un eletrissista. Ma, e saverla se ze vero?!
– Gheto visto, mò? Ti te ghè sempre massa sospeti in testa, Bepi.
– Ma, e geri de note, che mi zera ndà ntela riunion dea ciesa, parchè mi son fabriciero, e quando che son rivà casa ghin’ò visto nantro strànio ndar fora par el portel. Cossa dìsito adesso?
– Ma ghe gheto domandà ala fémena chi che l’era?
– La me ga dito che el zera el marangon e che lo gavea ciamà par rangiar la porta del guardaroba.
– Eco! Gheto visto, mò, che te ghè massa fantasie su par la testa?!
– Ma tasi, che adesso te conto nantra: sabo passà, go bio idea de ndar pescar. Son levà su la par le quatro. Go paricià i lambi e tuto quanto. Go picà el reboche ntea camioneta e son partio. Quando gavea fato gnanca novanta chilòmetri, go sentio che no l’era mia un giorno de ndar pescar. Vegnea zo na pioveta freda e fina che la me gavea belche ingelà i denoci. Quando go intacà el ràdio dea camioneta, go sentio che i disea che vegnaria zo tanta piova e tanto fredo. Alora, go fato a volta e son tornà indrio parché, con un tempo compagno, gnanca bel ndar pescar.

Co son rivà casa, go impiantà a camioneta ntea garase e son ndato rento ntel quarto pimpianeto e me go trato soto le querte. La dona la zera butada de banda e mi me go incostà ben darente dela so schena par scaldarme i denoci. Quando go sentio che la zera desmissiada, ghe go parlà ben basseto: “se te vedessi che tempo bruto e che fredo che ghe ze la fora!” Seto cossa che ela la ga dito?
”La ghe stà ben al me omo! El ze ndà pescar con un bruto tempo de questi.” Dopo te me disi, compare. Son sicuro che la pensea che mi fusse nantro. No la me ga gnanca cognossesto!