Dopo de due o trè mesi che’l se gà maridà, la so fémena la gà scominsià a restar co la pansa sgionfa.

Ghen’era un, na volta, che’l gavea nome de Bepi, ma tuti i lo ciamea de Zozè. Dopo de due o trè mesi che’l se gà maridà, la so fémena la gà scominsià a restar co la pansa sgionfa. Alora, Zozè l’è restà tuto contento parchè el pensea che la so fémena la zera ndrio spetar un tatin. E cada mese che passea, la pansa la vegnea sempre pì sgionfa. Dopo del quarto mese, la Zé nadata farse na consulta co’l dotor par veder se ghen’era qualche poblema, parchè no la se sentia mia tanto ben.
El dotor el gà zaminà, el gà zaminà e el gà catà de strànio anca lu, parchè el gà visto che no ghen’era gnente ntela pansa de a fémena, e el ghe ga racomandà che la ndesse consultarse no na pissicólaga. La pissicólaga la ghe ga fato tuti i ezami e la ghe gà dito che no la zera mia grávida, e che la so gravidès la zera na gravidès pissicolózica. E la ghe gà spiegà che sucede sta gravidès par via de tanta voia che la gavea de esser grávida, e la ghe gà racomandà che la tornesse in drio là del dotore. Quando che’l dotore el gà savesto de la gravidès pissicolózica, el ghe gà sbusà a pansa e ze vegnesto fora na mùcia de vento. Ma, el pedo ze, che tuti i ze vegnesti a saverla e i gà scominsià a ciamar Bepi de Zozè do Vento, e coionarlo. Quando che Bepi el passea nte na rua, tuti i ghe osea drio:
– Zozè do Vento... Zozè do Vento...
Bepi el restea cativo che gnanca na brespa, e de tanto che i lo gà coionà, el se gà comprà un rivolve e el gà prometesto che el primo che lo ciamea de Zozè do Vento, el ghe dea un tiro.
Ciò, come lera na pìcola cità, el vigàrio le vegnesto saverla, e come che’l vigàrio el comandea de pì che’l prefeito e che’l delegado, al gà visto che ghe volea far qualche cosa pa che no sucedesse qualche morte. Alora, a la doménega, ntela prédica, el gà parlà cossita:
– La nostra cità la ze na cità tranquila, e vui che la continue cossita. Gò savesto che ghe ze un pícolo problema, e bisogna resolverlo. Semo cristiani, e come cristiani bisogna volerse ben un col’altro. Gò savesto che la fémena de Bepi, che tuti lo cognosse come Zozè, gò savessto che la so fémena la gà bio un pìcolo problema, e adesso tuti i lo coiona e i ghe ciama de Zozè do Vento. Gò savesto anca, che Bepi el se gà comprà un rivolve. Alora, ze ora de fenirla. De incoi a vanti, Bepi l’è Zozè, e pronto.
Tuti i parochiani i ze restai chieti, co la testa bassa, parchè i gavea paura del vigário. El giorno drio, a la matina bonora, Bepi l’è ndà là ntela casa parochial par parlar co’l vigàrio:
– Padre, son vegnesto quà ringrassiarve de quel che ghi fato par mi, parchè se i continuea coionarme, un bel giorno ghin compea qualche dun, parchè gò ncora el rivolve ntea sintura.
El vigàrio el ghe dato na mùcia de consíli, ma pena che Bepi l’e ndà fora dea porta , che lera ndrio travessar la piassa, el vigàrio el gà scoltà due tiri: pán... pán... El vigàrio el gà coresto là, el gà catà Bepi ncora co’l rivolve in man, e un tosato stirà in tera, morto seco.
– Cossa gheto fato, Bepi? Cossa ze che mi gò parlà ntela prédica? Cossa ze che gavemo parlà pena prima? Te galo ciamà de Zozè do Vento?
– Nò... No el me ga mia ciamà Zozè do Vento?
– E alora, o gheto copà par chè?
– Parchè el me gà dimandà imprèstio del pistolin pa impienirghe i penei dea bissicleta...