Un Casamento sensa Barufa

– Bon giorno, comare!  
– Bon giorno, bon giorno!
– Come valo el compare, che l’altro di lo go catà meso sèrio? Galo guario ben da gamba che lera meso intriga de caminar?
– Se fusse sol de caminar. L’è là che el se lamenta che ghe fà mal da par tuto.
– Èh, go visto che lera meso sèrio.
– Ah, lu sempre el ze stà sério cossita, magari. 
– Mi cato de strànio che ve go mai visto barufar. Come ze che fio par star tanto tempo insieme sensan gnanca na barufa?
– Ben, par dirte la verità, la stòria la ga scominsià ncora vanti de maridarse. El stea distante de pi de vinti chilòmetri. Alora el vegnea a morose con una caretina tirada par na mula. Quela mula la zera el so Dio. La tratava come se la fusse na persona. Magari, quando no la ndea de acordo, el ghe dea scuriae fin che la fesse quel che lu el comandea.
– Ma se el ghe volea ben, el ghe dea scuriae parché?
– Èh che lu el ze sempre stà nervoso. Assa che te conto che nel giorno del nostro casamento, me pupà el ga volesto che féssino la festa a casa nostra. Alora l’è vegnesto cola caretina. Dopo de finio a festa, semo montai su ntela caretina pa ndar a casa sua. Quando gaveino fato tre, quatro chilòmetri, la mula la ga sbrissià e la ga menà la caretina nte na valeta. Alora, lu l’è levà su in pié, el ghe ga dato na scuriada ala mula e el ga osà: “son drio avisarte che la ze la prima volta”
– Ciò, ma l’era pròpio cativo!
– Ah, si, cativo che guai. Ben, ma dopo che gaveino fato nantri quatro cholòmetri, na lebre la ga travessà la strada e la mula la fato un salto, squasi che la rabalta la caretina. Alora el me marito l’è levà su in pié nantra volta, el ghe ga dato nantra scuriada e el ga osà: “son drio avisarte che la ze belche la seconda volta”.
– Cramegna!
– Si, si. Mi zera belche coi cavei in pié. Ma dassa star, che no gaveino fato gnanca nantri tre chilòmetri, co zérino drio passar nte un pìcolo matasel, na bissa la zera stirada in meso la strada e quando la mula la ze rivada darente, la ga scominsià mòverse e alsar su la testa. Alora, la mula la ga alsà su le gambe davanti e la ze restada in pié, alsada sora le gambe dedrio. El me omo, el ze restà fora dei sentimenti. 
– Santo Dio, comare!
– Si, si, compare. Dopo che la bissa la ze ndata via e che la mula la se ga quietà, el me omo l’è levà su in pié  par la tersa volta, el ghe ga dato nantra scuriada e el ga osà: “son drio avisarte che questa la ze la ùltima volta”. El ga ciapá el revolver e el ghe ga dato tre tiri. Alora mi ghe go dito: Gheto fato che? Copar la mula sol parché la se ga spaurà?
El me ga sol dato na vardada e el me ga dito: “son drio avisarte che questa la ze la prima volta”. Dopo de quel giorno là, no gavemo mai barufà.