Ntela entrada ghe ze un cartase che el dise: Se te vol scolier un marito, te ghè oportunità de far sol una vìsita

Go sentio dir che là in Caxias i ga inaugurà un Sòpin Senter ndove le fémene le pol ndar scolier un marito.
Ntela entrada ghe ze un cartase che el dise: “Se te vol scolier un marito, te ghè oportunità de far sol una vìsita. El Sòpin el ga sei piani e le qualità e i atributi dei òmeni i aumenta ala proporssion che te vè su. Ma ghe ze na règola: te pol comprar el marito ntel primo piano o ndar sempre pi in su, ma no te pol ndar in zo, sol se te vol ndar fora del Sòpin.
Alora, una cliente, che la zera spartia del marito, la ze ndata scolier un marito novo.
Primo Piano: Qua i òmeni i ze ben impiegai e i guadagna ben. 
No la ze mia restada contenta. – Vao pi in su – la ga pensà.
Ntel secondo piano, el cataze el disea:
Secondo Piano:  Qua i òmeni i ze ben impiegai, i guadagna ben e i ghe piase tanto de bambini.
– Nò, gnancora. Me ga mia piasesto. Avanti.  
Ntel terso piano:
Terso Piano: Qua i òmeni i ze ben impiegai, i guadagna ben e i ghe piase tanto de bambini e i ze bei.
– Cramegna, – la ga pensà – ma la ga bio la tentassion de ndar pi in su.
Ntel piano seghinte:
Quarto Piano:  Qua i òmeni i ze ben impiegai, i guadagna ben, i ghe piase tanto de bambini e i ghe giuta la fémena a far i laori de casa.
– Dio Santo Dio, – la ga dito. –  Ma la ga volesto ndar pi in su.
Ntel piano sghinte, un aviso:
Quinto Piano: Qua i òmeni i ze ben impiegai, i guadagna ben,  i ghe piase tanto de bambini, i ghe giuta la fémena a far i laori de casa e, par sora de tuto, i ze romàntichi come ghe piase le fémene.
La ga scominsià tremar sensa saver cossa far. La ga bio un grande dúbio. La volea scolier el marito lì ntel quinto piano, ma la tentassion de ndar ntel sesto piano la zera granda e la ga resolvesto  ndar.
Ntel sesto piano, ghe nera un cartase che’l disea:
Sesto Piano: Ti te sì la visitante nùmero 31.496.013 de questo piano. Qua no ghen è mia òmeni a venda. Te pol tornar indrio parché te ghè perso la única oportunità de catarte un marito. Gràssie par la visita al Sòpin Senter.