Un giorno Bepi el è ndà a Cassia par farse na consulta

Un giorno Bepi el è ndà a Cassia par farse na consulta. Ma sucede che el dotor el gavea el consultòrio ntel sètimo andar e Bepi el ghe ga tocà ciapar el elevador. 
Alora, quando che lera drio ndar su, ghe ga mancà luce ntel edifìssio e, par  desgràssia o na gràssia, Bepi el se ga ciapà lu sol, insieme con una putana, ma na putana de quele bele, sol che lu nol savea mia che la zera de quela  banda del diàolo. 
Co el se ga visto là sarà su, insieme con quela bela dona, col vestito un palmo de sora dei denoci, el ga scominsià a restar de tuti i colori e el ga perso el fil e anca el rochel. E ela no la ga mia perso tempo nò:  la ghe ga fato tute le proposte del mondo.
Ma Bepi el savea che el gavea la fameia casa e gnanca nol  volea mia tradir la Dosolina. E tira-e-mola e tira-e-mola, i ze restai squasi na ora e mesa vanti che vegnesse la luce. Dei culpi,  ghe ze anca vegnesto na bruta  volontà,  ma gràssie a Dio el ga vensesto la tentassion.
Ala doménega el è ndato confessarse parché el gavea imparà ntel catessismo che par far el pecato no ocorre farlo, basta aver la volontà. 
Pena chel ga fenio de contarghe al frate tuto polito come che la gavea sucedesto là rento del elevador, el padre el ghe ga dito:
– Bon, Bepi, dopo, quando che te vè casa, par penitensa te magni na panòcia de mìlio, ma nò na panòcia de mìlio verdo, bisogna che te magni na panòcia de mìlio maduro e de quel ben duro, anca.
– Ma come cossita, padre, magnar na panòcia de mìlio? Mi no son mia un mul, nò, par magnar na panòcia de mìlio? 
– Adesso nò no te si un mul, ma ntea ora che te zeri ntel elevador insieme con quela dona, te si stà un grandìssimo mul. 
Chi sà che con questa penitensa el ga imparà anca Bepi.