Quando che’l ga visto che la zera sensa gambe, el se ga meso tirà in drio.

Na volta ghen’era due sorele. Due tose bele che mai. Sol che una, la più gióvane, la zera desgrassiada, bela ma desgrassiada: la zera nassesta sensa le due gambe. Na volta, la sorela più vècia la ze ndata al baile, ma la ga volesto portarse insieme la so sorela desgrassiada, parchè la ghe fea anca pecà de dassarla sempre casa. 
Quando ga scominsià el baile, la ga metesta sentada nte na carega e la ze ndata balar. Ma, inte quela, ciò, un tosato el ga visto sta tosa la sentada e la ga catada anca bela. Sol che no’l gavea mia visto che la zera sensa gambe, e l’è ndato là par veder se no la volea mia balar na música. Quando che’l ga visto che la zera sensa gambe, el se ga meso tirà in drio. Ma ela la zera sol desgrassiada de le gambe, e la zera anca meso fogheta, e la ghe ga dito suito:
– Nò, nò, caro, balar mi no posso mia, ma par far altre robe, son bona anca mi.
El tosato l’è restà meso incabulà, e no’l savea gnanca cossa dir. E ela, alora, la ghe ga dontà suito na preposta:
– Varda, se te vol proar, mi gò na idea: la darente de la me casa ghe ze na pianta de mense; alora, te me porti fin lá, te me pichi nte a pianta e femo tuto quel ghe gavemo de far.
Ciò, el tosato, che lera meso imbalà, el ga catà la idea bona. La ga ciapada in brasso, la ga portada fin la darente  a casa, la ga picada nte a mensera, e dopo de far tuto quelo che i gavea de far, la ga despicada de a pianta e la ga portada casa, che la mama la zera ndrio spetarla.
El tosato le gnanca più tornà al baile. Le ndà casa dormir, ma no el ga dormio gnanca tanto polito, parchè el se ricordea de a tosa desgrassiada e el catea che’l gavea fato un bruto de un afar. Ala matina bonora, co la conssiensa piena, el ga ciapà e l’e ndà là de a casa de a tosa. Quando che’l gà batesto e che a mama la ghe ga verto a porta, alora lu el ghe ga dito:
– Mi son che’l toso che geri sera ve gò portà casa la vostra fiola, e par quela son vegnesto quà par dimandarve scuse de quel che go fato.
– Nò, nò, caro – ghe gà respondesto la mama – no ocore dimandar scuse, nò... Ti te si stato anca massa brao de portármela in drio. I altri, desfaciai, i la assa sempre picada la nte a mensera, poareta.