El libro el gavea figure de rospi, bisse e macachi.

Vanti che sciarasse em di
E che’l sol mostrasse le prime vampe,
Saltava sù de leto
Parchè la scola la era distante.
Caminava trè chilómetri,
Fin la zo a Canhada Fonda,
Braghetine a metà gamba,
Piè par tera e co la fionda.

Ntela testa un capeleto,
Caminava... Ma gavea ràbia,
Me sentia un ozeleto
A ndar rento nte na gàbia, 
Ma tuti i me parlea:
“Ghe vol ómeni estudiai
Pa no esser come noantri
Par soto e comandai.

Le me braghete co i tacuni
Nte i denoci e ntele culate,
Ntela bissaca libri e pignuni
E de le volte anca patate.
La régoa, a piera e a pena.
I libri co le foie onte
E na garafeta piena de áqua
E co’l panesel par lavar le conte.

Dio Santo... De a paura
I vegnea grossi i me oci,
Sbachetae zo pa testa
Che copea fin i pedoci
E se de volte qualche dum
L’era próprio desfacià
Nedea de castigo indenocià
Con un gran de mìglio soto i denoci.

El libro el gavea figure
De rospi, bisse e macachi.
El contea na stòria de na ava
Che zolea pa i campi e mati
A ciuciar el miel nte i fiuri
E par último el dibro el disea
Che fússino anca noantri
Compagni le ave: laoraduri.

Cossita l’è està la prima scola:
Come na brina de inverno
Che la da na sapecada par sora...
Quele righe del primo caderno
L’è stae le prime stradele
De me longo caminar,
Campagne le rose più bele,
Che le scominsia a butar.