Questa la gà sucedesto dal bon. I conta che, un paro de ani in drio, ghen’era TRE pescadori quà de Flores da Cunha, che tuti ani i ndea pescar su a Mato Grosso, là ntel Pantanal.

Questa la gà sucedesto dal bon. I conta che, un paro de ani in drio, ghen’era TRE pescadori quà de Flores da Cunha, che tuti ani i ndea pescar su a Mato Grosso, là ntel Pantanal. I dassea le fémene casa e ndea. Ma una de le trè fémene la gà scuminsiar a desconfiar se i ndea pròpio pescar parchè, de le volte i vighea casa con pessi mesi scureti, che i parea fin come che i pessi che se compra ntei supermercadi. Alora la ghe gà parlà a che altre:
– Ma sarà pròpio che i và pescar pessi o i và pescar altre robe?
– El mio, intanto – gà dito una – Son secura che’l và pescar parchè no gò mai bio na desconfiansa gnanca una de lù.
– El mio – gà parlà che altra – Son secura che’l và pescar parchè el gà na passion de morir de la pescaria.
Alora, ntela última volta che i ze ndai, i ze rivai casa contenti che mai, sol che no i gavea mia fato na bona pescaria. I gà portà casa due, trè tambicu, sete oto traíre, due carpa e meso dorado.
Alora, la fémena che la gavea sempra sta desconfiansa de le pescarie del so omo, la ghe gà dimandà:
– Come zea stata la pescaria?
– Ah, sto ano gà dato pochi pessi parchè la àqua la zera massa túrbia e dopo, par sora, ghen’era i fiscai de l’Ibama sempre ndrio sgionfar le balote.
– Ma come che i pessi i gà la carne scura cossita?
– È che’l nostro compagnero el se gà desmentegà de portar drio la cassa del zelo. Ma dime na roba: parchè no te me gh’è mia metesto rento de la maleta le mudande nove che mi gavea comprà a posta pa ndar far la pescaria? Me gà toca doperar le mudane sbuse e vècie.
– Mi le gò metesto rento, tuto polito!
– Come cossita, che mi gà sfrughà par tuta la maleta e no gò catà gnente?
– È che mi le gò metesto rento ntela to casseta dei spinei e dei lambi. Le gheto mia catea, o no te gh’è gnanca verto la casseta dei lambi?
L’omo l’è restà sensa parola.
– È... Mi gò sempre bio na pìcola desconfiansa de le vostre pescarie. Mi cato che te si ndà pescar sensa lambo, sol co la bacheta... Quela che mi cato...