– Nene, me ménito al paese co’l fuca, che quando rivemo là mi te impienisso el tanche?

La Dosolina la gavea de ndar al paese far le compre, e la ghe ga dito al so fiol:
– Nene, me ménito al paese co’l fuca, che quando rivemo là mi te impienisso el tanche?
– Si mama, spetì che vao torlo là in cantina.
El Nene el gavea un fuca 64, verdo, ma el ghe piasea mia de menar la mama in volta parché la zera massa sbrontolona, ma come che la ghe gavea dito che la ghe impienia el tanche, l’è nda a tuda carera torse el fuca in cantina, intanto che la mama la se  paricea. Ma no la ga gnanca fato ora de ndar rento ntel’auto che la ga scominsià sbrontolar:
– Maria Santìssima, ma che auto sporco! Sito mia bon lavar che la imundìssia qua? Onde zelo el panesel de netarse le man che lo gavea picà qua? E el rosàrio, onde o gheto metesto che lera picà ntel spècio? Ma Dio Santo, và pimpian...te sè che me fa mal a schena...và pimpian, te go dito... ze meio rivar tardi che no rivar mia!
– Segnor, mama, semo ndrio ndar a sessenta par ora!
– Mi no vui savérghene! No ocore che te passe dei sinquanta. Quando che rivo casa ghe conto tuto a to pare.... Come che la ventarola qua no la se vèrde mia? Sbassa zo che a mùsica li, te sè che no me piase mia che i tchunk, tchunk li! 
– Bon, mama, ma se ze pa ndar in volta no poder gnanca scoltar ràdio!
– Tasi su, te go dito! Và pimpian che la zo ntea bassada ghe ze sempre le polìssie! Garia fin caro che  i te desse na bona multa par veder se te impari. Zele maniere de corer cossita?... El giorno che tiro fora la me caderneta de chofero, no vui pi savérghene der ndar in volta con valtri due. Co to pare ciapo na mùcia de ràbia, e con ti, ciapo na mùcia de paura... Eco, te go dito che polìssie le zera li.
La polìssia la ga fato segnal che i se fermesse. El Nene el ga incostà l’auto nte na banda da stra e l’è nda là veder cossa che i volea. L’è stà là un quìndese minuti e la mama là che la pestolea de nervosa. Quando el Nene l’è retornà, la mama la ghe ga dimandà:
– Cossa ze che i volea?
– Èh... i me dato na multa.
– Ben feito! Te go dito che te ndessi pimpian...Maginàrsela! Scoltar la mama che la ze na bauca?!
– No l’è mi stà parché zera drio corer massa.
– Zeo stà parché, alora?
– Parché gavea mia le luce impiae.
– Come cossita? Luce impiae fora pal  giorno, pa far ché? Zei pròprio orbi cossita?
– No adianta, mama, adesso ghe ze la lege che toca ndar via cole luce impiae anca de giorno.
– Anca quela adesso!  No i sà pi cossa far par ciavar i soldi ala gente che laora. Speta che nantro colpo ghe dao el voto mi...Ma va pimpiam che adesso semo squasi drio rivar. Òcio che gne ze el “pega mola” là via... Ma parchè travar de colpo cossita? Vuto pròpio stravoltarme el col o vuto che impiante el naso su pa’l viero?... Cossa galo de apitar quel là de drio?
– El vol passarme via, mama.
– Alora, assa che’l passe, Madona. Galo tanta prèssia cossita parché? Nantra volta che’l se spartisse prima...
– Mi no lo asso mia passar parché dopo i me ride drio...
– Va là, va là, paiasso!... Stà pi darente a calssada o vuto che i me passe par sora? 
– Pa’mor de Dio, mama, basta de sbrontolar.
– Alora fèrmete qua, che adesso ghe manca poco e ndemo su a pié, vanti che suceda qualche assidente.