Na mama la gavea trè fioi e la ndea compir setanta oto ani

Na mama la gavea trè fioi e la ndea compir setanta oto ani. Alora, i fioi i se ga incombinà de farghe na surpresa. Cada un el ga pensà de darghe un bel presente a  la mama. Come che la mama no la gavea mai doperà scarpe de tachi alti, el pì vècio el ghe ga comprà un paro. Le meio scarpe che’l ga catà ntea loza. El ga guastà duzento cunti. Quando la mama la ga verto el pacoto del presente e che la ga savesto che’l gavea guastà tuti che i soldi lì, la ghe ga dito:
– Sito mato, fiol, guastar tuti che i soldi lì par darme un paro de scarpe che le doparo gnanca?  Te sè che me fa mal e gambe, che son fin intrigada de caminar...El secondo fiol, el volea darghe un presente meio del so fradel e l’è ndà comprarghe el profumo pì caro che’l gà catà. El gà guastà trezento cunti. Quando che la mama la ga savesto che’l gavea guastà trezento  cunti, la ghe ga fin bravà: – Ma come cossita, fiol, ndar guastar tuti che i soldi lì par darme un profumo? Te sè che  mi no me ga mai piasesto de profumi gnanca un. Alora, el fiol più gióvane, che’l savea che la mama la zera sempre in cesa, che la ghe piasea tanto de  pregar, e che’l savea che’l vigàrio el gavea un papagal che’l dizea su el Pater  Noster e la Ave Maria intiera, el gà pensà de darghe sto papagal a la mama e l’è ndà parlar co’l vigàrio. Come che’l vigàrio el ghe ocorea soldi par fenir de pagar le campane e che’l savea che i fioi i gavea na popansa gorda,  el ghe ga dito al tosato:
– Te sè  che’l papagal lì  el sà dir su el Pater Noster e anca la Ave Maria intiera. – Si, padre, ze par quela che vui dárghelo de presente a la mama, che alora la se passa via le ore scoltando el papagal a dir su el rosário.
– Si – ghe  ga dito el vigàrio – sol che che’l papagal lì el costa tré  mila cunti. El toso el se ga gratà la testa, ma come che’l ghe volea tanto ben a la mama e che’l volea darghe el meio presente, el gà raspà via tuta la so popansa e el   ga comprà sto papagal. El giorno drio, quando che i trè fioi i ze ndai catar la mama par veder come che la stea, la ghe ga dito al fiol più gióvane:
– Ti sì che te si stà furbo. El presente che te me ghe dato, son secura che no te ghè guastà tanto e  le stà quel che me ga piasesto de pì de tuti, parchè gò fato un bel brodo con quela galina verda.