Tuti i sà che un giorno o l’altro i ghe toca morir

La morte la ze la cosa più certa che ghe ze. Tuti i sà che un giorno o l’altro i ghe toca morir. Tanti, gnanca i se ricorda dea morte, ma tanti i fa tuta la so programassion par morir: o che i vol esser interai in piè, butai, e adesso, squasi tuti i vol esser brusai dopo che i more. Parchè, el me ga dito un, che el vol esser brusà,  che se’l va a l’inferno el sofre gnente parchè el riva la belche pronto, ocore gnanca che’l diàgolo lo bruse.
Ben, ma ghen’è stà un che’l gavea el desìdero de,  quando che’l morisse, che i ghe metesse su na fatiota azul. El ghe ga assá dito a la so  dona che,  pa’mor de Dio, no la se desmenteghesse de quel pìcolo detàlio: che i lo vestisse co’na fatiota azul.
Ma bisogna dir che el paron dela funerària no’l  savea mia, e quando che la viúva la ga visto el so omo rento ntel casson vestio co’na fatiota negra, la se gà  ricordà del so desìdero e la ga scumissià a pianzer e a osar  che lu el ghe gavea racomandà che i lo vestisse de azul. Alora,  i parenti che i zera li, i ga mandà ciamar el paron de la funerària  par veder se no dava par trucarghe la fatiota del morto.
– No ghe ze problema – el ghe ga dito – spetì sol na scianta.
Par sorte, nte nantra sala, ghen’era nantra viùva che la pianzea parchè el so omo el volea esser interà vestio de negro e el gavea su na fatiota azul 
El ga ciapà el casson dei due morti, che i zera in sima de na tola coe rodete e li ga menai tuti  due nte nantra sala sconta, e de la due, trè minuti l’è tornà indrio coi morti e i ghe postai cada un ntela so sala. Le due viùve le ze restea contente de veder i so òmini vestii de acordo come che i volea.
Ma, la gente che i zera li  i ga catà de stránio che’l paron de la funerària el fusse stà tanto sguelto de trucarghe le fatiote dei morti, e i ghe ga dimandà come che’l gavea fato, e lu el ghe ga respondesto:
– Par far più presto, mi no ghe go mia trucà la roba, ghe go sol trucà la testa e ghe gò ligà un fassoleto ntel col e pronto.
Mi sol volaria veder la fàcia de San Piero quando i ze arivadi la su: un co la testa de che l’altro. E el bel ze, che le viúve no le ga se ga gnanca nicorto.