I pi vècii i sà che tempo indrio quando rivea el mese de agosto, tuti lo savea che l’era el mese dei can rabiosi

I pi vècii i sà che tempo indrio quando rivea el mese de agosto, tuti lo savea che l’era el mese dei can rabiosi. El giorno de incoi se sente poco parlar de can rabiosi parché ghè la vassina contra la ràbia.
La ràbia la ze na malatia che la por esser transmitia ale bèstie e anca a le persone e, se pol dir, che la ga na insidéncia grandíssima de morte, squasi sento par sento. E la maniera pi comun dela transmission de questa malatia la ze traverso dei denti, de na morsegada. Prima la atinge el sistema nervoso sentral e dopo scomìnsia atinger tuto el corpo. 
Tuti i gavea paura de un can rabioso, praché el morseghea tuto quel che el catea. Se el morseghesse nantro can, el restea rabioso anca quel. Se el morseghesse na persona, l’era la condenassion ala morte. Parquela, spessialmente ntel mese de agosto, tuti i restea cole récie in pié. Se i vedesse qualche can che el gavesse i sintoma dela ràbia, i ghe tochea coparlo a s-ciopetae. 
Quando un can el restea rabioso, scominsiava a corer sensa fermarse e morsegar tuto quel che el catea. E un segnal grando che un can l’era rabioso, ze che el molava  tanta sbiuma  fora par la boca.
Sucede che Toni el gavea un can bianco e negro, parquela el gavea nome de Tubiano.
Un giorno, ntel mese de agosto, co el riva casa, la so dona la ghe ga dito:
– Toni, me par che el Tubiano l’è deventà  rabioso parché el ga scominsià a scainar e a corer in volta. Ze belche due ore che l’è scampà via a tuta a carera e no lo go pi visto.
Ciò, Toni el ga ciapà el s-ciopo e l’è ndà in serca del Tubiano.
El ga passa tuta la visignansa:
– Gavì mia visto un can bianco e negro?
– El to Tubiano? Cossa galo sucedesto?
– Par la maniera che la me dona la ga parlà el ze deventà rabioso.
Alora, anca i visigni i ga ciapà la so s-ciopa par ndar in serca de sto can rabioso. Dopo de dimandarghe a tute le fameie là in torno, i ga catà na dona drio lavar roba ntel tanche.
– Visigna, gavio mia visto un can bianco e negro?
– Nò, mi no go visto gnanca un can passar par de qua. Parché, cossa galo?
– Bisogna che sté atenta parche l’è un can rabioso.
– Ma come che savì che l’è rabioso?
– Prché el ze cola testa bassa e cola coa in meso le gambe.
La dona la se ga metesto e man ntea testa:
– Ah, Maria Santìssima! Me toca corer casa. Son sicura che el me omo l’è deventà rabioso anca lu  parché l’è diversi giorni che l’è là cola testa bassa e la coa in meso le gambe.