l vecieto Bòrtolo lera el più grande bestemador de tuti

l vecieto Bòrtolo lera el più grande bestemador de tuti. No lera capace de dir trè parole, sensa tirar fora un porco de quei grossi. E ncora, par sora, el coionea quili che ndea in cesa. El dizea che i zera na trupa de magna-òstie. Ma come tuti i gropi i riva al pètene, un giorno, Bòrtolo el se gà ciapà pròprio mal, e quando che’l gà visto che’l moria, el gà mandar ciamar el vigàrio. El vigário, che’l savea chi che lera Bòrtolo, che’l savea delle besteme che’l tirea fora, che no’l ndea mai a messa e gnanca confessarse, el gà pensà de converterlo vanti che’l morisse. Lora el ghe gà dito: - Bòrtolo, vanti de morir, bisogna che te te confessi e che te sìpie pentio de tuti i pecati che te ghe fato, e de tute le besteme che te ghè tirà. Bòrtolo restea chieto, sensa dir na parola. Lora el vigàrio el continuea: - Bòrtolo, so’ndrio parlar con ti. Ghe vol che te me sculti. Vanti de morir, bisogna far na opzione: renegare el demônio, o renegare a Cristo. Bòrtolo no’l dizea gnente. Lora el vigário el se gà infiamà: - Bòrtolo, la ze la ùltima volta che te parlo: se te vol ciapar la benedizion, e se te vol che te daghe el’òio santo, bisogna che te reneghi el demònio. Ma se te vol mia renegar el demònio, lora te dago la maledizion, e vao via. Lora Bòrtolo el ghe gà respondesto al vigàrio: - Padre, par intanto no vui renegare gnanca el demônio e gnanca el Signore, parche vui restare de ben con tuti due, vanti de saver se vago in paradiso o se me toca ndar a l’inferno.