Domènega passada el ze stà el giorno del pupà el giorno che i fioi i manifesta tuta la sua afetividade.

Domènega passada el ze stà el giorno del pupà el giorno che i fioi i manifesta tuta la sua afetividade.
Ma, vui dir che no i ze mia tuti i fioi che i ghe dà el valor che el ga un pupà ntela fameia parché, sti giorni indrio, go scoltà na fioleta che la ghe parlea de incontro a la so mama e la ghe dimandea cossita:
– Mama, mi go scoltà la professora che la ga dito che le stà el Signor che el ga fato el mare, le piante, el sol, la luna, le stele... e che el ze stà Lu che el me ga creà anca mi. Zeo vero, mama?
– Si che ze vero, cara bambina. El ze stà el Signor che el ga fato tuto el mondo e che el te ga fato anca ti.
– Nantra roba: la nona la me ga dito che quando mi son nassesta, la ze stata na segogna portarme qua casa. Zeo vero, mama?
– Si che ze vero, fiola. Un bel giorno de sol, na segogna bela, bianca, la ga passà qua casa zolando. La gavea na sporta picada ntel beco e ti te zeri rento ntela sporta e ela la te ga assà qua ntela nostra fameia.
– Zeo vero, mama, che quando mi perdo un dente e che lo meto sora la finestra, la striga la vien portarmi i soldi?
– Ma si, cara, ze tuto vero.
– Mi volea dimandarve nantro roba, mama: 
– Cossa vuto saver, adesso?
– Vui saver se ze vero che el ze el Papai Noel che el me porta i presenti quando che riva el giorno de Nadal?
– Ma si, cara fioleta. Tuti i presenti che te guadagni de Nadal el è el Papai Noel che i te li porta. E anca quando che riva la Pàscoa, el è el conìcio che te porta i uvi de cicolate.
– Ma, alora, mama, el pupà sèrvelo pa far ché qua casa?!