Come che i savea che tuti i sàbi, quando che lera casa, l’omo ndea giugar le carte ntea bodega, i lo gà spetà lá.

Questa stòria dà par contarla, parchè l’omo en question l’è belche morto.
Tanto tempo in drio, un sofero de camignon quà de Noa Trento, el viaiava tanto su là par San Paolo, e quando che’l tempo no laorea mia polito, stea fora de casa, de le volte, anca un mese, parchè le strade no le gavea mia l’asfalto gnancora, come ncoi.
Ciò, sucede che lu lera maridà, e la fémena casa, ela sola, pora can, no la zera bona de far tuta che a vigìlia lì, de spetar un mese intiero che’l so omo el ritornasse. Alora, par cavarse la voia, na volta a stimana, al manco, la saltea a serca. Ma due compari del motorista i gà descoerto tuto e i se gà combinà, Che quando che’l rivesse casa, i ndea conterghe tuto.
Come che i savea che tuti i sàbi, quando che lera casa, l’omo ndea giugar le carte ntea bodega, i lo gà spetà lá. Quando che l’è rivà, i ló gà ciamà de na banda e i ghe gà dito:
– Noantri due, come che semo compàri de casamento, gavemo la obrigassion de contarte na roba trista, ma gavemo paura che te resti cativo.
– Nò, nò, podì parlar quel che savì, parchè la verità, più tàrdi o più bonora la vien fora.
– Ma sito securo, mò, che te vol saverla tuta?
– Si che son securo.
– Ben, alora se la ze cossita, scolta sol na roba: quando che te vè viaiar e che te resti fora de più de dieze giornade, la to fèmena la salta la serca, e savemo anca onde che la và.
– Sio securi de quel che si ndrio parlar? Varidì che a ze na roba sèria, è?
– Semo securi come un ciodo novo. La gavemo vista diverse volte, co’i nostri óci.
Come che’l sofero el savea  che i sò compari i zere invidiosi che mai, el ghe gà dito cossita:
– Ben, volio che ve dighe chè mi? Mi sol ve digo na roba: se ghe nè de quei Che i ghe và drio a la me dona, ze segnal Che la ze bona, e no la ze mia trista Che gnanca le vostre done. Par quela, mi ve dimando na roba: par chè che no i ghe và mia drio a le vostre?
Pensando ben, el gavea razon anca lu...