Come che’l dotor lera un de quei pì antighi, el credea che quando qualche dum el gavea el sangiuto, lera sol darghe un spauron, che’l sangiuto el se fermea.

Te lo sè cossa che l’è el sangiuto. In brasilian se dise soluço.
Quando se ze pìcoli, el salgiuto el sucede tante volte. Dopo co se vien grandi, se ga ncora el sangiuto, ma manco volte.
Ben, na volta, na mònega quà de Nova Trento, la ze ndata consultarse co um dotor in Cassia, e quando che la ze rivada là ntel consultòrio, la gavea sto maledeto sangiuto. Come che’l dotor lera un de quei pì antighi, el credea che quando qualche dum el gavea el sangiuto, lera sol darghe un spauron, che’l sangiuto el se fermea.
El dotor el gà consultà sta mònega tuto polito come che ghe volea, mal el gà visto che ela la continuea co sto sangiuto. Alora el gà pensà de darghe un spauron el ghe ga dito:  
– A senhora está grávida, irmã!
Ciò, con quela, la mònega la gà ciapà un bruto de un tremon, e el sangiuto el se gà fermà de colpo, e el dotor el se ga fin desmentegà de quel che’l ghe gavea dito a la mònega e ela la se vegnesta casa. Poareta, de note, no la ga podesto dormir gnanca un menuto a pensarghe sora de quel che’l dotor el ghe gavea dito. 
Due giorni dopo, la ze tornada là del dotor nantra volta par saver come che la gavea de far, cossa che la gavea de magnar e tuto quanto che na fèmena gràvida la gavaria de saver. El dotor el ga ridesto e el ghe ga dito:
– Nò, nò, cara, no stà preocuparte. Mi te gò dito che te zeri gràvida sol par darte un spauron per veder se te passea el sangiuto, e el te gà passà dal bon. Ma no ghe ze poblema gnanca un, cara.
– Come, no ghe ze poblema gnanca un, dotor? Femo chè adesso, che quando el vigàrio el ga savesto che mi zera gràvida el se ga trato dò del campanil?