Ghen'era una, sti ani, che tuti i mesi la seitea dirghe su pal so omo:

Ghen'era una, sti ani, che tuti i mesi la seitea dirghe su pal so omo:
– Mi volaria comprarme un ràdio, pol esser un radieto picoleto che me piase scoltar le mùsiche de Tinico e Tinoco, de Piero Bento e Zé da Estrada, de Gilo e Jalo, do Tesserinha e anca escoltar qualche novela.
Ma, el so omo no lera mai de acordo:
– Sto mese no dà mia parché gavemo ncora de fenir de pagar fora el frizider. Speta el mese che vien quando che vao tirar fora i soldi de a ua.
E tuti i mesi el catea fora na scusa par non comprarghe el ràdio. E tanto la ga spetà che un giorno l'omo el ga bio un afano e l'è morto. 
Trè mesi dopo che la ze restada viuva, la ga vendesto arquante galine, uvi, fasui, e fin na piègora la ga vendesto e la se ga imucià quaranta cunti.  La ga ciapà el caval e la ze ndata ntel paese comprarse sto ràdio. Nte na losa el costea setanta cunti. Nte nantra, otanta cunti.  Ntea tersa losa, la ga catà un radieto par sessanta cunti. Ma la ghe ga parlà al paron dea losa:
– Mi go sol quaranta cunti, no dà mia par farme un descontin?
El paron dea losa, che l'era meso birbo e che'l ga visto che la viuva la zera ncora intiera, el ghe ga fato na preposta:
– Mi te vendo el ràdio par quaranta cunti, sol de te vien là rento e femo qualche scherso. Cossa dìsito?
– Pénsito che mi sìpie na putana? 
– Ma va là, va là... El to omo l'è belche morto e nessun vien saverla.
Infati, la gavea tanta gola de sto ràdio che la ga concordà. I ze ndai rento de scondion, i ga fato quel che i gavea de far e pronto. Ma fin che ela la ze ndata la fora ntel caval torse a borsa par meter el ràdio rento, el paron dea losa el ga ciapà un maton de sei busi, el ga fato su un bel pacoto, el ghe ga impiantà un toco de fil de fero come se'l fusse la ntena, e ela la ze ndata via tuta contenta, ma co na paura de can che qualche dun la gavesse visto cossa che la gavea fato co'l paron dea losa.  Che nessun vegnesse saverlo, p’amor de Dio!
Quando che la ze rivada casa, la ghe ga dito a la so sogra:
– Varda quà el ràdio. Adesso si podemo scoltar le nostre mùsiche.
Ma intanto che la ze ndata darghe de magnar ai porchi e tratar le galine, la sogra la ga verto el pacoto e la ga catà el maton, e la ga visto che i la gavea imbroiada, e quando che la ze tornada indrio, la sogra la ghe ga dito:
– Vol dir che sta volta si i te lo gà parado sù pròpio?
Ela, che la pensea che i gavea descoerto el pecato che la gavea fato, la ga sol dito cossita:
– No stà dirme che i ze belche ndrio parlar ntel ràdio cossa che gò fato co'l paron dea losa!?