Tempo indrio, quando i se maridea, no lera mia come el giorno de incoi. I savea poco o squasi gnente, spessialmente sora el assunto del secso.

Tempo indrio, quando i se maridea, no lera mia come el giorno de incoi. I savea poco o squasi gnente, spessialmente sora el assunto del secso.   
El pupà el gavea na vera averssion e anca na grande vergogna de messonarghe ai fioi sora questo problema. 
La mama, gnanca ela no la ghe parlea gnente ale fiole de come che la sucedea dopo de maridae e cossita i se maridea coi òcii sarai. Dopo, magari, pimpianeto i imparea tuto.
Alora, ga sucedesto che ghen è morto na vecieta de otanta due ani e la ga assà el so vecieto védovo de otanta nove ani. Ma el bel ze che no i zera mia gente poareta, i zera gente siora, i gavea tanti capitai e el nono no el se ga mia contentà de restar lu solo, parché el gavea na casa granda, se pol dir che el gavea na manson e na salute de fero. 
Par via che el gavea sto grande capital, i so amighi, savendo che el nono el volea catarse fora na morosa, i ga tacà ndar in serca de qualche duna che volesse maridarse. Ma lu el ghe gavea assà dito che nol volea savérghene de vècie, el volea na fémena là in torno de quaranta ani. 
I ghinà catà diverse interessae, spessialmente interessae ntel capital del nono, solche quando le ghe parlea sora la salute e che lu el ghe disea che el se sentia come un dóvane de disdoto ani, le caschea fora, parché le savea che el durea ancora diversi ani.
Ma de tanto ndar in serca, i so amighi i ghinà catà fora una scàpola, poareta, de quarenta tre ani. I ga fato de tuto par converserla che la se maridesse parché anca luri i zera premosi de na bela festa de casamento.
Infati, ze rivà el giorno del matrimónio. Na festona compagna mai vista. 
Bisogna dir cge ne quel tempo, no ghenera mia luce elétrica, alora i costumea doperar i ciareti col petròlio. Quando i ze rivai ntel quarto, cada un el se ga tirà nte un canton par cavarse zo la roba. Mal e mal che i podea véderse pareché el nono el gavea assà la vampa del ciareto ben basseta de a vergogna che la sposa lo vedesse nudo. Dopo che i zera tuti due pronti, la sposa la ghe ga dito al nono:
– Vanti de noantri butarse zo ntel leto, volea dirte che mi no sò cossa che me toca far parché nissun me ga mai spiegà gnente e volea dirte anca che son ncora vèrgine.
El nono el ze restà sensa parola. El ghe ga sol dito cossita:
– Alora, si, semo ben ciapai: ti no te sè cossa far e mi me go belche desmentegà.