Tempo indrio, ghen era tanto de pi respeto coi i vècii, cola gente d’età

Tempo indrio, ghen era tanto de pi respeto coi i vècii, cola gente d’età. 
Se na persona de età la ndesse rento nte un ònibus e che i banchi i fusse tuti ocupadi, sempre ghen era qualche dun che’l ghe dea el posto ntel assento. O se un vècio rivesse nte un posto che ghe fusse tute le careghe ocupade, sempre ghen era qualche dun che’l se levea su dela carega par oferessérghela al nono che’l se sentasse.
El giorno de incoi, ghe ze fin la lege, le tabele da par tuto che le dise che ze par darghe preferensa ale persone d’età, ma squasi nissuni rispeta gnanca la lege e gnanca le tabele. 
Alora, ga sucedesto che, stimana passada, ghen era un vecioto ntela rodoviária. Quando l’ònibus l’è rivà e che’l vecioto, cola so bengala, el se ga invià par montar su, na trupeta de sinque tosati e tosatei i se vegnesti a tuta a carera par ciapar el meio posto e i ghe ga dato un urton al vècio. El ga proà tégnerse, ma la bengala la ga sbrissià e lu l’é caisto stirà in tera.
El pupà dei tosati e tosatei l’è rivà là tuto spaurà. El ga ciapà el vècio par tirarlo su e el ghe ga dito:
– Par carità, nono, bisogna che metì la goma (la borasigna) ntela ponta dela bengala, par che no la sbrìssie mia pì.
Alora, el nono el ghe ga respondesto:
– E ti, se te gavessi metesto la goma ntela ponta dela tua feramenta, no te gavarissi tanti fioi cossita e ghin saria posto par tuti rento ntel ònibus, sensa tanta prèssia.