El se gà trato in drio schena e el gà tacà a osar.

Toni e Bepi i ghe piazea tanto de cassar. Tute le doméneghe i ciapea la so sciopa e i’ndea. Quel che i catea, zo sciopetae: porchi spin, lagardi, ciuti, sabià, lebre, beca-soche, de tuto, pò.
Na doménega i zera ndrio far la so cassada, e Bepi le ndà pissar de drio d’um caressaro. El ghe gà mia pestà in sima de na bissa! Sacranon... La gà fato um salto e la ghe gà dato un becon ben giusto ntel pirulin de Bepi. El se gà trato in drio schena e el gà tacà a osar. Toni el gà coresto là, el gà visto Bepi trato in tera e a bissa de na banda che la saltea. El gà ciapà un baston e el gà copà la bissa, ma quando che’l gà visto onde che a bissa lo gavea becà, l’è restá desperà. E Bepi che l’osea:
 – P’amor de Dio, Toni, ciapa el caval e curi ciamar el dotor!
Toni el gà ciapà le sinele in man, e via a tuta a carera. Quando che l’èl rivà ntel l’Ospedal, el dotor lera ndrio far na operassion e no’l podêa mia dassar là. Ma Tóni, el gà volesto parlar co’l dotor, par veder cossa che’l podea far. Alora el dotor, che no’l savea en che posto che Bepi el gavea ciapà el becon, el ghe gà dito a Tóni:
– Mi no posso mia ndar là, ma te fè cossita: te ciapi el caniveto, te fà un taieto onde che a bissa la gà becà, e dopo te toca ciuciar, fin che vien fora tuto el velen.
Tóni el se gà gratà a testa, ma n’l gà parlà gnente. El gà ciapà el caval e l’è torna in drio. Quando che l’è  rivà, el gà catà Bepi ancora là stirà che l’osea come un mato, e el ghe gà dimandà:
– Onde zelo el dotor?
– Caro da Dio... El dotor e l’è ndrio far na operassion e no’l pol mia vegner.
– Ma ghe’to parlà con lu, al manco?
– Sì che ghe gò parlà...
– E te ga’lo dito chè?
– Ah, Bepi... Perdoname, ma el dotor el gà dito che no ghe ze remedi pa che’l mestier lì e che te toca morir.
Sì, bon! Amici sì, ma nò ciuciar fin che vegnesse fora tuto el velen...