Mi gera qua drio pensar dea difarensa de vita dei tosatei da ani indrio e de incoi

Mi gera qua drio pensar dea difarensa de vita dei tosatei da ani indrio e de incoi.
Incoi, i tosatei i guadagna, de presente de Nadal, un Skate de mila reai. Sti ani, i guadagnea un caretin de matéria plàstica, e che contenti que i restea.
Incoi i sà sol giugar col Tablet, col Vídeo Game. Na volta, i tosatei i fea carere coi careti fati de legno zo par le rive ntei potreri e i restea desperai quando se spachea na roda, o se fruea el esso, o se spachea un caìcio, parché l’era tuto fato de madera.
I tosatei de incoi i fà guere col PlayStation 5, X.box, intanto che da ani indrio i fea guere con boasse de vaca, con scorse de angùrie e anca con balochi de baro.
I giuguea con una bola fata con un calsseto de fémena pien de strassi, o quando i copea un porco, alora i fea la bola cola bessiga. E quante volte che i se spachea le óngie parché i giughea de pié par tera e, pi ardi, i pi siori i se comprea un paro de Kichuti.  El giorno de incoi, i guadagna le meio bole de coro che ghe ze ntel mercado e tenis importai, parché se no i ze importai dela meio marca, li dopara gnanca.
El giugo de na volta l’era: “Vaca amarela cagou na panela...” e guadaghea quei che i restea chieti. Incoi i giuga con Game Pass, Smart Robô.
El giorno de incoi se i fà qualche matità, i li mete nte un canton diese minuti par far na meditassion sora quel che i ga fato de sbalià. Na volta, ghe zera sempre la stropa drio ala porta, o na bacheta de codogni, sempre pronte. Guaia Dio far qualche dispeto. Fin le sinele fate de peneo le servia par smacarche su par le culate e che le dassava fin le marche par sete, oto giorni.
I tosatei del giorno de incoi i resta tristi se casca la Internet. Invesse, sti ani, i restea triste quando caschea la tatuase del chiclete.
Me ricordo anca, che i comprea sorvete seco sol par guadagnar el anel che ghe zera par sora.
E par finirla, son sicuro, che i tosatei de incoi no i sa cossa che i ze i pedoci, i bis de pié, i raticun, le rosete e gnanca no i cognosse cossa che l’è un lambo e i se spaura se i vede na mignoca, e ndar pescar lambari ntel assude, i pensa che sìpie robe de nantro mondo.