Tuti quili che i zera là nte a bodega i se gà fermà de giugar e carte pa scoltar sto omo che’l contea la stória

El giorno de incoi, co’sti auti che i core a mila, tuti i giorni ghin sucede tanti assidenti.
Stimana passada, ghe’nera na turmeta, che i giughea e carte là ntea bodeda. De là de un pochetin, cápita un, tuto spaurà e scumìnsia a parlar:
– Gente de Dio, se savissi che bruto assidente che gà sucedesto la zo darente el Rio da Zanta! Ben, due, son securo che i ze restai morti nte a ora, e che altro i ló gà menà a Cassia, ma, mi cato che no’l scampa mia...
– Ma gheto visto i morti, ti?
– Si, si, son rivà pròpio nte a ora. Ben, ma intanto che ve la conto, ciò, bodeghero, dame un ovo coto nte l’azeo, che son quà morto de a fame. Ben, come zera ndrio contarla, quel più ben ciapà el zera impiantà co a testa soto l’assento del’auto e con tuti i due brassi stravoltai.
– Maria Santíssima!
Tuti quili che i zera là nte a bodega i se gà fermà de giugar e carte pa scoltar sto omo che’l contea la stória, e cada pochetin, el ghe dimandea al bodeghero nantro ovo coto ntel’azeo, e intanto che’l contea la stòria el magnea uvi. E el gà continuà:
– Ben, ghen’e stà nantro che, che l’e stà trato distante un dieze metri. El gávea la testa taiada par metà. Un braço el zera distante del corpo un quatro metri. Che altro braço el zera taià em quatro tochi. Ciò, bodeghero, dámene nantro ovo coto ntel’azeo.
– Che bruto mestier, Madona...
– Ben pa incurtarla, le gambe, i ze gnanca stai buni de catarle. Mi go mai visto un bruto laoro compagno. Son quá co stómego tuto raverso. Ben, ma adesso mi me toca ndar casa che la dona la ze là che la me speta.
De tanto emossionà che lera, el se ga gnanca ricordà de pagar i uvi che’l gávea magnà intanto che’l contea el caso de l’assidente, ma quando che’l ga ciapà El capel pa ndar via, el bodeghero el ghe ga osà:
– Ciò, compare, e i uvi?
Lu el penssea che’l bodeghero el zera ncora ndrio dimandarghe de l’assidente, el ghe ga rispondesto:
– Si bon, se no i ze stai buni de catarghe e gambe, te pol imaginarte se i ghe ga catà i uvi...
L’è stà pròpio un bruto assidente...