Sti ani, tute le fameie le gavea el costume de dir su el rosàrio, dopo de La sena. Intanto che le fémene le lavea zo i piati, che altri i s’indanocea in tera, i se spalanchea su pa na carega e là i preghea. Tanti i ciapea sono, là indanociai zò.

Sti ani, tute le fameie le gavea el costume de dir su el rosàrio, dopo de La sena. Intanto che le fémene le lavea zo i piati, che altri i s’indanocea in tera, i se spalanchea su pa na carega e là i preghea. Tanti i ciapea sono, là indanociai zò.


Bisogna dir che tute le fameie le gavea na corona granda, comprada a posta par quel che tirea vanti el rosàrio, par contar le Ave Marie. Sol che, na volta, nte na fameia, i gà perso la corona e, el pedo ze, che ghe’nera sol quela, parchè i zera anca poereti. Alora, el fradel più vècio, che lera più studiá e che’l gavea l’incargo de dir su el rosàrio, el ghe gà dito a so pare:

– Pupà, mi cato che a gurisada i gà perso la corona, e no son bon de catarla fora.
I ze ndai in serca de sta corona e no ghe ze stà cristi de catarla fora. Alora, El pupà el ghe gà dito:

– Fà cossita, fiol: stà darente a la nona, che la ze magreta e che la gà il filon dea schena alto. Alora, te ghe palpi el filon, che l’è tuto pien de gnocheti, e cossita te cunti le Ave Marie, co’i gnochi del filon dea schena de la nona.

E cossita el fiol el gà fato. El se gà tirà darente la nona, e el gá scuminsià a contar le Ave Marie. Cada Ave Maria che i dizea, ndea zò un gnochêto. Ma sucede Che le Ave Marie le ze tante, de più che i gnocheti del filon de a schena, e quando che l’è rivà la zò in fondo, ntel’ultimo gnocheto, el ga dimandà:

– E adesso, pupà, che se gà fenio i gnocheti, femo che?
Alora, el pupà, che lera belche stufo de pregar, l’é restà cativo, parchè el gá visto che no ghe zera maniere de ndar vanti co’l rosario, el ghe gà osà:

– Se te gh’è fenio i gnocheti, daghe un baso nte a medaia e ndemo dormir.
Ma, se ben che’l gavesse tanta fede, el fiol no’l gà bio coraio de basar la medaia dea nona, nò...