Generino, Bepi e Bartoldo i laorea de pinturi...

Generino, Bepi e Bartoldo i laorea de pinturi, nte na firma granda là a Cassia. Ntel mese de febraio passà, i z’era là che i pintea un edifìssio. Quando che i z’era, maisomeno ntel dèssimo quinto andar, Bartoldo el ga dato na osada e el se ga incucià zo co’e man nte’a pansa.
– Cossa ghe’to? – ghe ga dimandà Bepi.
– Pa’mor de Dio, giuteme, che me ga saltà un bruto mal de pansa che me par de crepar. Mi cato che, sta volta, la fao in braghe.
– Sito mato!
– Mi cato che a me scampa la zo in sima a calsada.
– Vuto pròprio perder el laoro de pintor? Vuto pròprio farla in sima la testa de la gente che passa in te’a rua?
– Ma volio che fae chè, se a ze ndrio scamparme?
– Ma cossa ghe’to magnà?
– Gnente no gò magnà; gò solche bevesto vin dolso, pó...
– Ma no sta mia far na matità, è, Bartoldo! Bati nte’a finestra, par veder se vien qualche dun verder, almanco.
Alora Bartoldo el ga batesto ntel viero, e gràssie al Signor, ghe ze vegnesto na dona verder la finestra e lu el se ga trato rento e l’è ndà a tuta a carera ntel bagnero. Ma, intanto che l’era là ndrio svodar la pansa ntel bagnero, la fora ze vegnesto un bruto colpo de vento, che ga spacà le corde de l’andaime e Generino e Bepi i ze cascai zo e i ze morti tuti due, pori can.
El giorno drio, ghen’era tuta la vissinansa e i parenti de Generino e Bepi là ndrio far el velório. Tuti che i se lamentea, che i piangea. Ma de la un pochetin riva el paron de’a Firma onde che i laorea, el ga dimandà la parola e el ga parlà:
– So’n vegnesto quà portar le condolense a le due femeie de i due morti: a la fameia de Bepi, e a la fameia de Generino. Ma vui dir, anca, che la nostra Empresa la se compromete de darghe na casa nova e pagarghe la provision de alimenti par diesi ani ale védove e ai fioi dei morti.
Bartoldo, che l’era là anca lu, el ga vardà la so dona e el ga parlà:
– Che desgràssia, nò Angelina!
– Na desgràssia, próprio... E ti, bruto c...gon, bisognea che te fussi stà ntel bagnero próprio in te che a ora che ze cascà zo l’andaime?
– Ma la colpa la ze stata tua, che te me gh’è dato de bever el vin dolso. O gavéito pi caro che mi gavesse casca zo insieme co’Generino e Bepi?
– Pi caro, no digo... ma na caseta nova e magnar par dieze ani, me la passaria ben anca mi...
Tuto colpa del vin dolso...