Lera belche arquanti mesi che Toni el parlea che qualche giorno el volea ndar picarse nte un ramo de na pianta par via che’l se gavea meso mal ciapà.

Lera belche arquanti mesi che Toni el parlea che qualche giorno el volea ndar picarse nte un ramo de na pianta par via che’l se gavea meso mal ciapà. El gavea fato imprìstio ntel Banco e no lera pi bon de farghe a volta. La fémena la zera sempre mal ciapada, piena de magagne e i guastea na mùcia de soldi al mese soto i dotori e anca par comprarse i remedi.
Alora el ga pensà che saria meio morir de na volta e el seitea dir che’l volea picarse dal bon. E tanto el ga parlà, che un giorno i lo ga visto ciaparse su na cordeta e inviarse via pal potrero. Quando la so dona la ga visto che no’l tornea pi in drio, la ze ndata contarghe ai vizigni che la calculea che Toni lera ndato picarse dal bon. I vizigni i ze ndai a tuta a carera par veder se i lo catea. Co i ze rivai là in meso el mato, i ga visto che, de fato, Toni lera là picà, ma invesse de esser picà pa’l col, lera là picà par la pansa, là che’l sbrindolea in quà e i’nà. Alora el vizigno el ghe ga osà:
– Sito ndrio far chè, Toni?
– Gavea mia dito mi che qualche giorno volea picarme?
– Si, ma alora se te volei pròpio picarte, parchè che no te gh’è mia ligà a corda ntel col?
– El primo colpo la go ligada mi ntel col, ma ga scuminsià mancarme el fià, tusi, ncora ben che’l ramo lera meso seco e el se ga spacà e son caisto la zo in terá, robe che me cope. Par quela che, ntel secondo colpo, me go picà par la pansa. E valtri no gavì mai credesto quando che mi dizea che qualche giorno volea picarme... Adesso si ndrio veder che son picà...
– Si, caro, ma se te volei pròpio morir, ghe volea che te te picassi pal col, no par la pansa.
– Ma mi no go mai parlà che volea morir, mi go sempre dito che un giorno volea picarme, par quela che son quà picà. Adesso, sio ndrio crederme, o nò gnancora?