Sérzio Carpeziani, che l’è belche undeze ani che l’è de star la zo a Tores, sabo passà l’è vegnesto catarme, e el me gá contà questa de bona.

Sérzio Carpeziani, che l’è belche undeze ani che l’è de star la zo a Tores, sabo passà l’è vegnesto catarme, e el me gá contà questa de bona. Te lo sè che, sti ani in drio, no l’era mia come el giorno de oncoi, nò. Quando che i tachea smorosarse, no i podea ciaparse gnanca te le man. Malemale che i podea vardarse e strucarse de òcio. Il primo baso, lora, sol dopo de maridai. Par quela che ghe nera tanti, specialmente tosati, che i gavea fin vergogna da la sposa e no i savea gnanca come far fioi. Lora, Sérgio el me gà contà che’l gà cognossesto un tosatoquà de Frores da Cunha, che lera de star la zo darente onde, adesso, ghe ze el campo de futibol. Un bel sabo de matina, sto tosato el se gà marida, parche ne quel tempo i se maridea vanti mezo-giorno. I gà fato na bela festa de nosse, con menestra de capeletti, lesso, surasco, sagu, vin a volontà e tuto quanto. La par le quatro i gà fin fato un bailezinho de gaita. Ne quel tempo no i fea mia la “lua-de-mel” come che i deze oncoi. Lora, co ze rivada la ora de ndar dormir, la sposa, che la zera un pochetin de più birba, la se gà butà suito te leto pa spetar el noivo. Ma come che lu el gavea vergogna, el se gà sentà te un bancheto, là te um canton. De più che ela lo ciamea, de più lu sbassea a testa. Quando che la gà visto che no ghe zera maniere, la zé ndada parlar co’l pupà del tosato. El pupà l’è deventà cativo che gnanca na brespa. El gà ciamà el fiol e el ghe e el ghe gà dimandà: - Vuto mia butarte insieme co la to sposa par che? Lora lu el ghe gà respondesto: - Par vu le fàcile, pupà, che ndi sempre dormir insieme co la mama, che la ze de la nostra fameia... Ma mi gò vergogna de cavarme zo le robe e ndar butarme insieme co na strània...