L’era belche diversi giorni che’l nono e la nona no i ndea mia tanto de acordo.

L’era belche diversi giorni che’l nono e la nona no i ndea mia tanto de acordo. Tute le note, vanti de dormir, i fea a so barufeta e no ghen’era cristi che i ndesse de acordo.
Na note, che par coincidenza l’era el giorno che i fea cinquanta nove ani de maridai, el nono el gà fato pròprio el mul par véder se a nona la se desmissiea fora. Alora la nona la gà tacà dirghe su:
- Nhanca oncoi, che femo cinquanta ani de maridai, no te si bon de scumissiar?
- Mi te gò belche dito, nona, che te scumíssi ti, manco na volta, che mi son belche stufo e agro.
- La me mama la me gà sempre ensegnà che l’è sempre l’omo che’l ghe toca tirar a vanti.
- La to mama la ze belche morta e no la gà gnente de véder. Se te vol, scumissiar, scumíssia ti, che oncoi mi no scomíssio, no scomíssio e no scomíssio. Gnanca che’l diàgolo el vegne tirarme pa’e gambe e impiantarme la forca.
- Ma varda che te si próprio un testardo, è... pedo che un mul impacà ntel bagnado.
- Quando che digo che no scumíssio, no scumíssio e pronto. Parchè che no te scumíssi mia ti, manco na volta?
- Ma parchè che te vui che scumíssie mi? Infinale, chi zeo l’omo quà casa?
- L’omo quà casa son mi, ma oncoi son’drio comandarte che te scomíssi ti...
- Ben, ben, gò belche visto que con mui impacai no dà pa ndar avanti. Assa che scumíssio mi e pronto: Ave Maria seia de graça o Senhor é convosco...
E cossita i gà dito su el rosário intiero...