Adesso che semo ndrio assister la novela de San Giorgi, me ze vegnesto in mente na storieta che me ga contà Olisse Mantovani.

Adesso che semo ndrio assister la novela de San Giorgi, me ze vegnesto in mente na storieta che me ga contà Olisse Mantovani.
Ve recordì che, là in torno de l’ano mila novessento e sinquanta, le fameie dea colónia no le gavea mia auti come incoi, e alora, pa ndar a messa i ndea a caval e, pi che sia, de camignon. En tute le capele, ghen’era sempre qualche dum che gavea un camioneto, e el menea la gente a messa.
Là zo dela capela San Vitor, lera Orlando Muraro che’l gavea un camioneto, e tute le doméneghe l’impienia el casson de gente e, cossita, tuti i ndea a messa co sto camioneto e, ntela prédica, la prima roba che’l Frei Eugènio fea, lera ringrassiar i soferi dei camignuni.
Ma, me ga contà Olisse che na doménega, dopo che i zera belche in cesa, ze vegnesto zo un temporal, na piovada, robe de rabaltar zo el campanil. I ze restai tuti preocupadi, parchè i savea che pa ndar casa no lera mia fàcile, parchè, ne quel tempo no ghen’era mia l’asfalto, le strade, quando che piovea, le zera pericolose. Ma come che i ghe tochea ndar casa, dopo dea messa, i ze saltai su ntel camignon e i se ga partio. Quando che’l camioneto de Orlando el ga tacà ndar zo pa riva de l’Zanta, el ga scuminsià a sbrissiar de tute le bande. Un colpo ndea ntea valeta de a banda sanca. Dopo el se ndrissea e el caschea zo de che altra banda. La gente i ga tacà osar e i se tegnea su come che i podea, pori can. Ma quando che i ga visto che’l camignon el se inviea sempre de pi, i ga scuminsià a saltar zo, a trarse in sima le scapoere, sora i caressari. Fin el sofero l’è saltà fora dea cabina, e el camignon l’è ndà fermarse rento un valeton.
Tuti che i se lamentea co le robe moie e sbregae, le gambe spelae, caice spacae... Ma quando che i ga visto onde che’l camignon el se gavea fermà, i ze restai tuti de boca verta a veder che l’ùnico che no gavea mia saltà zo, lera Olisse, parchè savì che lu l’è stà sempre un omo de tanto coraio. Lera ncora là picà ntel casson del camignon. Alora el sofero el ga coresto là e el ghe ga dimandà:
– Par chè che no te gh’è mia saltà zo anca ti?
– Parchè mi go sempre bio tanta fede a San Giorgi, e go sempre el santin picà quà ntel col. Várdelo quà, mò.
Ciò, quando che’l ghe ga mostrà el santin de San Giorgi a Orlando Muraro, i ze restai tuti due sensa parola, parchè, ntel santin, ghen’era sol el caval. Fin San Giorgi el se gavea trato zo. E se no volì mia creder, podì far de manco, ma Olisse el me ga dito che lu el confirma tuto, sìpie verità o sìpie busia.
*Ivo Gasparin