– Bon-giorno, comare! – Bon-giorno, bon-giorno! – Ma che fredo che se gà voltà!

– Bon-giorno, comare!
– Bon-giorno, bon-giorno!
– Ma che fredo che se gà voltà!
– Ma si! Geri, zera fin intrigada de caminar del caldo. Incoi, un fredo de questi! Me gà tocà de meter su la flanela, sta matina bonora!
– Toca cuidarse co sto tempo, parchè la me nora la gà ciapà un resfrero che a ghe gà tocà de ndar consultarse!
– Fin el tempo l’è ndrio deventar mato co sto mondo, comare.
– La me mama sempre la disea, ela: vedarì cossa che vegnarà fora se la và cossita.
– Stà gnanca parlar che son quà mesa persa de i sentimenti, par comprarghe un presentigno de natal pa’l me neto. Ma no sò gnanca cossa comprarghe, parchè so pare lo gà belche impienio de potaci.
– Mi, comare, par no sbaliar ghe gò dimandà cossa che’l volea guadagnar de presente de a nona. El gà volesto un senolar.
– Ma quanti ani galo el to netigno?
– El và fárghene, adesso en abril, belche nove ani.
– Ma con oto ani, el vol belche el senolar?
– Si, si, comare! A me fiossa, la gà un fioleto de sete ani, e el gà belche el so senolar. E par veder sol che robe. El sà belche i númeri de na mùcia de gente, e el ghe telefona, anca.
– Ma mi me fà na ràbia, comare. No se pol gnanca pi parlar co la gente. Specialmente co la giuventù. I ze sempre picai su pa sto senolar. Se ghe te parli, i te varda gnanca in fàcia.
– Ben, mi gò el me fiol pi vècio, el se senta in tola par magnar, mi cato che no’l sà ganca cossa che’l mete in boca, parchè el dà na sboconada, e l’è belche là ndrio sfrugnar su pa sto senolar.
– Tasi, comare, che l’altro dì mi zera là ntel banco, e gò sentio na fèmena che la gà scuminsià a sberegar... Gò vardà in drio... La zera ndrio parlar co’l so omo ntel senolar, e là vegnea fora de tuto.
– Ben, ma assa che me toca ndar, parchè son belche ndata en due loze par veder el prèssio. Ma mi pensea che i fusse pi barato che i potaci li. Dopo no sò gnanca quel comprarghe, parchè i me gà mostrà un tresento tipi. Ma mi cato che ghe dao el pi baratin che cato. Dopo, pi tardi, che so pare el ghin dae un come che’l vol lù.
– Altro che ntel nostro tempo! Se guadagnea na bonecheta fata de strassi, e che contente che se restea.
– Si, si, comare, no stà preocuparte, che ghe zè la me vizigna che ela la scambia el senolar come che la scambia le braghete.
– Ben, assa che vao, parchè de quà un pochetin i sara su anca le loze. Ciao, camare, e se no se catemo pi, un Felice Natal par ti e par tuta la to fameia.
– Anca par ti, comare. El che’l Gesù Bambin el ne porte soldi e salute. Ciao.