Ani indrio, se gavea el costume che le fameie le ndea a messa tute le Doméneghe

Ani indrio, se gavea el costume che le fameie le ndea a messa tute le Doméneghe. Ma dele volte gnanca tuti i pode andar parché bisognea star casa qualche dum par ndarghe drio ale bèstie e altri laori. E tante volte la fémena la ghe tochea star casa par far magnar.
Alora, na Doménega, Toni l’è ndà a messa lu sol e la so dona la ze restada casa par farghe de magnar, parché ala Doménega el magnar lera un poco diferente, un pochetim meio che via par la stimana. I copea na galina, i fea la menestra de capeleti, el frio e tante volte anca el sagu.
Dopo dela messa Toni l’è ndà bever la so caciasseta ntela bodega e l’è rivà casa darente mesdì. Pena che l’è rivà in cosina, seben che la so dona la pesesse in torno de novanta chili, la ga ciapada in brasso e el ga tacà cantar e balar. La fémena squasi che la deventa mata parché nol gavea mai fato na roba compagna e anca la gavea paura che la molasse in tera. Ma Toni el continuea a cantar e a balar con tuta la forsa, fin chel se ga stufà.  Quando chel se ga fermà e che la ga molada in tera, la so dona la ghe ga dito de incontro a lu:
– Una dele due: o te sì ciuco, o mi cato che el vigàrio el ga parlà ntela prèdica che bisogna che i òmeni i trate ben le so done.
– Gnanca una dele due: el vigàrio el ga sol parlà che, se volemo ndar in paradiso, bisogna che cada un porte la so crose con alegria.